شاندی باڵای هەرێمی كوردستان لەگەڵ كونسوڵ و نوێنەرانی 23 وڵات كۆبووەوە

ئاڤا نیوز

بەمەبەستی خستنەڕووی وردەكاریی كێشەكانی نێوان هەولێر و بەغدا و وەستانی هەناردەكردنی نەوتی هەرێمی كوردستان، شاندێكی باڵای هەرێمی كوردستان لەگەڵ كونسوڵ و نوێنەرانی 23 وڵات كۆبووەوە.

بۆچی گرنگە: حكومەتی هەرێمی كوردستان لە ڕێگەی كونسوڵ و نوێنەری وڵاتانەوە، دەیەوێت ناڕەزایەتییەکانی خۆی سەبارەت بە پابەندنەبوونی بەغدا بە ڕێككەوتنەكان و نەناردنی شایستە داراییەكانی خەڵكی هەرێمی كوردستان بە وڵاتەكان بگەیێنێت كە دواجار ئەمە دەبێتە گوشارێك لەسەر بەپرسانی حكومەتی عێراق بۆ ئەوەی پێداچوونەوە بە بڕیار و هەڵوێستەكانیان بكەن.

زانیاریی پەیامنێر: كوردستان حەسەن پەیامنێری دیبلۆماسیی ئاڤا میدیا ڕایگەیاند: لە كۆبوونەوەكە  سەفین دزەیی، بەرپرسی فەرمانگەی پەیوەندییەكانی دەرەوەی حكومەتی هەرێمی كوردستان باسی لە ناوەڕۆكی كێشەكانی نێوان هەولێر و بەغدا و  شایستە داراییەكانی هەرێمی كوردستان و گرفتەكانی بەردەم هەناردەكردنەوەی نەوتی هەرێمی كوردستان و زیانی وەستانی پرۆسەكەی بۆ كونسوڵ و نوێنەرە ئامادەبووەكانی كۆبوونەوەكە كرد.

زانیاریی زیاتر: لە بەشێكی كۆبوونەوەكەدا، ئاوات شێخ جەناب، وەزیری دارایی و ئابووریی حكومەتی هەرێمی كوردستان داتا و زانیاریی پێویستی سەبارەت بە ئەو بڕە پارەیەی لەلایەن حكومەتی عێراقەوە بۆ مووچەی فەرمانبەرانی هەرێمی كوردستان نێردراوە و گرفتە داراییەكانی دیكەی نێوان هەولێر و بەغدا خستەڕوو.

لێدوانی فەرمی: دوا كۆتاهاتنی كۆبوونەوەکە هەریەك لە سەفین دزەیی، سەرۆكی فەرمانگەی پەیوەندییەكانی دەرەوەی حكومەتی هەرێمی كوردستان و پێشەوا هەورامانی، گوتەبێژی  حكومەت وردەكاریی و ناوەڕۆكی كۆبوونەوەكەیان خستە ڕوو.

 

- سەفین دزەیی ڕایگەیاند: حكومەتی هەرێمی كوردستان هەمیشە ئامادەیە بۆ گفتوگۆ، بەداخەوە ئەو ڕێككەوتنانەی كە لەنێوان هەولێر و بەغدا لە پێشووتر كراون جێبەجێ نەكراون و هۆكارەكەش حكومەتی عێراقە، هەوڵەكانی حكومەتی هەرێمی كوردستان بۆ دەستپێكردنەوەی هەناردەكردنی نەوت بەردەوامە و وەستانی پرۆسەكە زیانی 23 ملیار دۆلاری هەبووە.

- پێشەوا هەورامانی، گوتەبێژی حكومەتی هەرێمی كوردستان ڕایگەیاند: لە كۆبوونەوەكەدا لە پاڵ ژمارە و داتا پەیامی سیاسییش خرایە ڕوو، كۆنسوڵ و نوێنەرە ئامادەبووەكان ڕاپۆرتی خۆیان ئامادە دەكەن و دەیدەنە باڵیۆزخانەكانیان و ئەوانیش گلەیی و پەیامەكانی هەرێمی كوردستان دەگەیەننە حكومەتی عێراق و داوای ڕوونكردنەوە دەكەن.

ئەمەش بزانە: شاندی هەرێمی کوردستان لە هەریەك لە ئومێد سەباح، سەرۆكی دیوانی ئەنجوومەنی وەزیران، ئاوات شێخ جەناب وەزیری دارایی، عەبدولحەکیم خەسرەو سەرۆکی فەرمانگەی هەماهەنگی و بەدواداچوون و ئامانج ڕەحیم سکرتێری ئەنجوومەنی وەزیران و ژمارەیەك ڕاوێژكار پێکهاتبوون.