لە هەولێر نۆ كۆمپانیای هێنانی كرێكاری بیانی دەدرێنە دادگە

 

ئاڤا نیوز

 

ئاڤا بەدواداچوونی بۆ كەیسێكی گرنگ كردووە و دەركەوتووە بەشێك لەو كۆمپانیایانەی كرێكاری بیانی دەهێنن بۆ هەرێمی كوردستان تێوەگلاون لە تاوانە ڕێكخراوەكان و لە ماوەی ساڵێكدا نۆ كۆمپانیا دراونەتە دادگا.

 

وێنە گەورەكە: ئاڤا لە سەرچاوەیەكی تایبەتەوە خشتەی ئاماری بەڕێوەبەرایەتییەكانی بەرەنگاربوونەوەی تاوانە ڕێكخراوەكانی كەوتۆتە دەست، دەركەوتووە نزیكەی 30 كارمەندی بیانی بوونەتە قوربانی جۆرێك لە جۆرەكانی بازرگانیكردن بەمرۆڤ، بەهۆی ئەوەی بەشێكیان دووچاری كاركردنی بەزۆرەملێ هاتوون و بەشێكیان بۆ بازرگانی سێكسی بەكارهێندراون.

 

زانیاری بەدەستهاتوو: بەڕێوەبەرایەتییەكانی بەرەنگاربوونەوەی تاوانە ڕێكخراوەكان لە ماوەی حەوت مانگی ڕابردوودا چاوپێكەوتنی لەگەڵ زیاتر لە دووهەزار و 300 كارمەندی بیانی لە هەرێمی كوردستاندا كردووە، دەركەوتووە 30 لەو كرێكارانە ڕووبەڕووی كاری سوغرە یاخود بازرگانی سێكسی بوونەتەوە، لەسەر ئەو كەیسەش 9 كۆمپانیا دراونەتە دادگە و 33 تۆمەتباریش دەستگیركراون و دۆسیەكانیان هێشتا لە قۆناغی لێكۆڵینەوە دایە.

 

زانیاریی زیاتر: ئاڤا زانیویەتی هەشت لەو كرێكارە بیانیانەی دووچاری گێچەڵی سێكسی هاتوون ڕەوانەی خانەی داڵدەدانی ئافرەتان كراون و 10 لە كرێكارەكانیش دیپۆرتی وڵاتانی خۆیان كراونەتەوە.