نووسینگەکانی دابەشکردنی مووچە لە عێراق دەست بە مانگرتن دەکەن

ئاڤا نیوز

 

خاوەنی نووسینگەکانی کی کارد و دابەشکردنی مووچەی فەرمانبەران، مانگرتن ڕادەگەیێنن و مووچەی فەرمانبەران دابەش ناکەن، ئەم هەڵوێستەشتان دوای ئەوە دێت کە پارێزگاری بانکی ناوەندی عێراق ڕایگەیاندبوو، ئەو نووسینگانە بێ مۆڵەت کار دەکەن. 

 

ڕاگەیێنراوی فەرمی: نوێنەرایەتی نووسینگەی دابەشکردنی مووچەی فەرمانبەران نووسراوێکی بڵاوکردووەتەوە و ڕایگەیاند: لە ڕۆژی 20ی ئەم مانگەوە مانگرتنی سەرتاسەری لەدژی لێدوانەکانی پارێزگاری بانکی ناوەندی ڕادەگەیەنن و تا کاتێک نادیار، هاوکات نووسینگەکان داوا دەکەن لەلایەن کۆمپانیاکانەوە مۆڵەتی فەرمیان پێبدرێت.

 

هەر بەگوێرەی بڵاوکراوەکەیان، مووچە و شایستەی فەرمانبەران و خانەنشینان و چاوەدێری کۆمەڵایەتی دابەش ناکەن تا ئەو کاتەی داواکارییەکانیان جێبەجێ دەکرێت و مافەکانیان جێگیر دەکرێت. 

 

زانیاریی زیاتر: لە ئەگەری داخستنی نووسینگەکان، فەرمانبەران دەبێت بچنە لقی بانکەکانی ڕەشید و ڕافیدین بۆ وەرگرتنی مووچەکانیان بەمەش فشارێکی زۆر لەسەر ئەو لقانە دروست دەبێت و ڕووبەڕووی کێشە دەبنەوە. 

 

ئەوەی پێویستە بیزانیت: خاوەنی ئەو نووسینگانە لە پارێزگای نەجەف ڕۆژی هەینی خۆپیشاندانیان ئەنجامدا دژی لێدوانەکەی پارێزگاری بانکی ناوەندی.