قەتەر: ڕێککەوتنی نێوان حەماس و ئیسرائیل کاتژمێر 8:30ی بەیانی یەکشەممە دەچێتە بواری جێبەجێکردنەوە

ئاڤا نیوز

 

گوتەبێژی وەزارەتی دەرەوەی قەتەر ڕایدەگەیێنێ، ڕۆژی یەکشەممە کاتژمێر 8:30 بەیانی بە کاتی ناوخۆی غەززە ئاگربەست لەو کەرتە فەلەستینییە دەکەوێتە بواری جێبەجێکردنەوە.

 

وێنە گەورەکە: ڕۆژی چوارشەممەی 15ـی 1ـی 2025، دوای 15 مانگ لە شەڕ و کوژرانی زیاتر لە 46 هەزار کەس، ڕێککەوتنی ئاگربەست و ئازادکردنی دیلەکان بە نێوەندگیریی ئەمریکا و میسر و قەتەر لەنێوان حەماس و ئیسرائیل ڕاگەیێنرا، بەپێی مەرجەکانی ئاگربەستەکە لە هەنگاوی یەکەمدا شەش هەفتە شەڕ ڕادەگیرێ و 33 بارمتەی ئیسرائیل کە لەلایەن حەماسەوە بە دیل گیراون، ئازاد دەکرێن.

 

ڕاگەیێنراوی فەرمی: ماجد ئەنساری، گوتەبێژی وەزارەتی دەرەوەی قەتەر لە ئێکس ڕایگەیاند، لەسەر بنەمای ڕێککەوتنی نێوان هەردوولا و وڵاتانی نێوەندگیر، ئاگربەستی غەززە لە کاتژمێر 8:30ی بەیانی ڕۆژی یەک شەممە دەچێتە بواری جێبەجێکردنەوە.

 

زانیاریی زیاتر: ئەنساری لە درێژەی قسەکانیدا ڕوودەکاتە دانیشتوانی غەززە و دەڵێت، "ئامۆژگاریی براکانمان دەکەین کە خۆپارێزی بکەن، وریا بن و چاوەڕوانی ڕێنماییەکانی سەرچاوە فەرمییەکان بن".

 

ئەوەی پێویستە بیزانیت: لەبەرامبەر ئازادکردنی ئەو ژمارە دیلە لەلایەن حەماسەوە، ئیسرائیل 737 بەندکراوی فەلەستینی ئازاد دەکات. بەگوێرەی وەزارەتی دادی ئیسرائیل ڕادەستکردنەوەکە تا کاتژمێر 4ی ئێوارەی ڕۆژی یەکشەممە ناکرێت.