تیکتۆک بۆ ئاڤا: کێشەکەمان چارەسەر کرد و لە ئەمریکا دەست بە کارکردن دەکەینەوە

ئاڤا نیوز

کۆمپانیای تیکتۆک لە وەڵامی پرسیارێکی ئاڤا میدیا ڕایدەگەیێنێت، کێشەکەیان لەگەڵ دۆناڵد ترەمپ چارەسەر کردووە و  ئەپڵیکەیشنەکە لە ئەمریکا دەکەوێتەوە کار. بەمەش هیچ بەکارهێنەرێک لە کوردستان و عێراق و سەرتاسەری جیهان تووشی گرفت نابێت.

وێنەگەورەکە: ئەمڕۆ یەکشەممە کۆمپانیای تیکتۆک لەژێر فشاری دەسەڵاتدارانی ئەمریکا کارەکانی ڕاگرت، دەستبەجێ ئەپڵیکەیشنەکە لە ئەپڵ ستۆری و پلەی ستۆری بەکارهێنەرانی ئەمریکا سڕایەوە، بەکارهێنەرانیش چیتر نەیاندەتوانی ئەپدەیتی بکەنەوە یان ئەگەر بیسڕنەوە دووبارە دایبەزێننەوە، ئەمەش ناڕەزایەتیی فراوانی لێکەوتەوە. لە کوردستان و عێراقیش ئەو بەکارهێنەرانەی ئەپڵ ئایدیان لەسەر ئەمریکا بوو تووشی گرفت دەبوون.

لێدوانی فەرمی: کۆمپانیای تیکتۆک لەڕێگەی ئیمەیڵەوە وەڵامی ئاڤا میدیای دایەوە و ڕایگەیاند:

٠ کێشەکەمان چارەسەر کردووە، دۆناڵد ترەمپ {کە سبەی وەکو سەرۆکی ئەمریکا دەستبەکار دەبێت} دڵنیایی پێداوین کە تیکتۆک لە ئەمریکا ڕووبەڕووی هیچ سزایەک نابێتەوە.

٠ بە ڕێککەوتن لەگەڵ ڕاوێژکارانی خستنەکاری خزمەتگوزارییەکانمان، ئێستا لە پڕۆسەی خستنەوەکاری خزمەتگوزارییەکانمانین لە ئەمریکا.

 

 ٠ وەک تیکتۆک لە دابینکردنی خزمەتگوزاریی بۆ زیاتر لە 170 ملیۆن ئەمریکی و ڕەخساندنی هەلی کار بۆ زیاتر لە حەوت ملیۆن کەس بەردەوام دەبین.

٠ سوپاسی سەرۆک ترەمپ دەکەین، هەڵوێستێکی بەهێزە کە دژی سانسۆرکردنی تیکتۆکە لە ئەمریکا، لەگەڵ سەرۆک ترەمپ کار دەکەین بۆ چارەسەرێکی درێژخایەن بۆ ئەوەی تیکتۆک لە ئەمریکا بمێنێتەوە.

ئەوەی پێویستە بیزانیت: کۆمپانیای تیکتۆک لە چەندین وڵات بە هۆکاری جیاواز ڕووبەڕووی سنووردارکردن و داخستن یان هەڕەشەی داخستن بووەتەوە، یەکێک لەو وڵاتانە ئەمریکایە، لە دادگای باڵای ئەو وڵاتە فشار دەکرا کۆمپانیاکە بفرۆشرێتە کۆمپانیایەک چینی نەبێت.