لەسەر سۆماڵیلاند، میسر و تورکیا هۆشداریی تووند دەدەنە ئیسرائیل

ئاڤا نیوز

 
قاهیرە و ئەنقەرە دژی ناساندنی سۆماڵیلاد وەک دەوڵەتێکی سەربەخۆ لەلایەن  بنیامین نەتانیاهۆ، سەرۆکوەزیرانی ئیسرائیل هاتنە دەنگ.

 

وێنە گەورەکە: نووسینگەی بنیامین نەتانیاهۆ، سەرۆکوەزیرانی ئیسرائیل بە شێوەیەکی فەرمی ناساندنی کۆماری سۆماڵیلاندی وەک دەوڵەتێکی سەربەخۆ و خاوەن سەروەری ڕاگەیاند، بووە یەکەم دەوڵەت لە جیهاندا دان بە جیابووەوەی سۆماڵیلاند لە سۆماڵ بنێت.

 

کاردانەوەکان: وەزیرانی دەرەوەی میسر، تورکیا، سۆماڵ و جیبۆتی لە دژی هەنگاوەکەی ئیسرائیل بۆ داننان بە سەربەخۆیی سۆماڵیلاند بەرەیەکیان پێکهێنا و ڕایانگەیاند "ڕێگە نادەین یەکپارچەیی خاکی سۆماڵ تێکبدرێت."

 

زانیاریی زیاتر: هەر چوار وڵاتەکە بە توندی هەڵوێستەکەی ئیسرائیلیان شەرمەزار کرد و ڕایانگەیاند کە ئەم هەنگاوە پێشینەیەکی مەترسیدارە و هەڕەشەیە بۆ سەر ئاشتی و ئاسایشی نێودەوڵەتی. 

 

لەلایەکی دیکەوە: میسر ڕایگەیاند پاراستنی سەروەریی سۆماڵ بەشێکی دانەبڕاوە لە ئاسایشی نەتەوەیی میسر. پێشتریش عەبدولفەتاح سیسی، سەرۆککۆماری میسر هۆشداری دابوو "ڕێگە نادەین هیچ لایەنێک هەڕەشە لە سۆماڵ بکات، ئەگەر داوای هاوکاریمان لێ بکەن، بە کردەیی وەڵاممان دەبێت."

 

ئەمەش بزانە: هەرچەندە سۆماڵیلاند لە ساڵی 1991ـەوە سەربەخۆیی خۆی ڕاگەیاندووە، بەڵام تائێستا هیچ وڵاتێکی ئەندام لە نەتەوە یەکگرتووەکان بە فەرمی نەی ناساندووە و ئیسرائیل دەبێتە یەکەم دەوڵەت ئەو هەنگاوە بنێت.