لە سەردەشت كەسێك بە هۆی ڕەنووی بەفر گیانی لەدەست دا

ئاڤا نیوز

 

لە گوندی ئاڵۆتانی میراوای سەردەشت لە ڕۆژهەڵاتی کوردستان بە هۆی ڕەنووی بەفر کەسێك گیانی لەدەست دا و سێ کەسی دیكەش بێسەروشوێنن.

 

لێدوانی فەرمی: حەمید مەحبوبی، بەڕێوەبەری كۆمەڵەی مانگی سووری پارێزگای ورمێ ڕاگەیاند: بەهۆی ڕەنووی بەفر لە گوندی ئاڵۆتانی میراوای سەردەشت چوار كەس کەوتنە ژێر بەفرەوە، یەكێكیان گیانی لەدەست دا و سێ کەس دیكەش تا ئێستا بێسەروشوێنن.

 

زانیاریی زیاتر: حەمید مەحبوبی، دەڵێت، تیمێك لە فریاكەوتنی مانگی سوور چوونەتە شوێنی ڕووداوەكە و تەرمی یەكیان دۆزیوەتەوە و گەڕان بەدوای سێ كەسەكەی دیكە بەردەوامە.

 

لەلایەکی دیکەوە: دوێنێ لە گوندی قەزنەسەی سەروو سەر بە پارێزگای ورمێ شاخەوانێک لە کاتی شاخەوانیدا هەڵدێراوە و گیانی لە دەست داوە، دوای پێنج کاتژمێر ڕۆیشتن تیمەکانی مانگی سووری ئێرانی گەیشتوونەتە شوێنی ڕووداوەکە و تەرمەکەیان دۆزیوەتەوە.

 

ئەمەش بزانە: ئەمە لە کاتێکدایە پێشتر کەشناسی هۆشداریی لە نالەباریی کەشوهەوا و مەترسییەکانی چالاكیی شاخەوانی بە هاووڵاتیان دابوو.