كێشەی خەرجنەکردنی شایستەی هەزاران جووتیاری دهۆک چارەسەر کرا

ئاڤا نیوز

 

دوای ئەوەی لە بانکی "تی بی ئای" کێشە بۆ خەرجکردنی شایستەی دارایی جووتیارانی سنووری پارێزگای دهۆک دروست بوو، ئەندامێکی پەرلەمانی عێراق دەڵێت: گرفتەکە چارەسەر کراوە و ئەم هەفتەیە دەتوانن پارەکانیان وەرگرن.

 

چیرۆكی سەرەكی:  لە 12ـی ئەم مانگە، بڕی چوار ملیار و 500 ملیۆن دینار لەلایەن حكومەتی فیدڕاڵەوە خرایە سەر هەژماری بانكیی بەڕێوەبەرایەتیی بازرگانی و بەروبوومی دهۆک لە بانكی بانكی بازرگانیی عێراق-TBI، بەمەبەستی دابەش كردنی بەسەر جووتیارانی ئەو پارێزگایە لەبەرامبەر ڕادەستكردنی بەرهەمی گەنمی ئەمساڵیان بە سایلۆ، بانكەكە ڕەتی كردەوە پارەی ئەو جووتیارانە خەرج بكات كە بریكارنامەیان بۆ كەسێكی دیكە كردووە بۆ وەرگرتنی شایستەكانیان.

 

لێدوانی فەرمی: كاڤین شێخ سەعید، پەرلەمانتاری عێراق لە فراكسیۆنی پارتی دیموكراتی كوردستان بە ئاڤای ڕاگەیاند، بە هۆی خەرجنەكردنی شایستەكانیان لەلایەن بانكی (تی بی ئای) كێشە بۆ پێنج هەزار جووتیاری شێخان و فەیدە و دۆمیز و ناوچەكانی ماددەی 140 دروستبوو.

 

-دوای گەیاندنی كێشەی ئەو جووتیارانە بە بەرپرسانی حكومەتی فیدڕاڵ و وەزارەتی كشتوكاڵی عێراق، دەستبەجێ كێشەكەیان بۆ چارەسەر كرا و بانكی (TBI) ئاگادار كراوە بە خەرجكردنی شایستەكانیان بەبێ هیچ گرفتێک.

 

- ئەو پەرلەمانتارە ڕوونیشی كردەوە، ئەم هەفتەیە، جووتیاران دەتوانن لەڕێگەی بریكاردارەكانیانەوە سەردانی بانكی ناوبراو بكەن و شایستەكانیان وەربگرن.