هەمواری یاسای بودجە بۆ دانیشتنی سبەی پەرلەمان زیاد کرا

 

ئاڤا نیوز

سەرەڕای ڕاگەیاندنی کارنامەی دانیشتنی ڕۆژی سێشەممەی ئەنجوومەنی نوێنەران، کە چەند بڕگەیەیەکی لەخۆ دەگرت، بڕگەی دەنگدان لەسەر هەمواری یاسای بودجە ئەوەی پەیوەندی بە نەوتی هەرێمی کوردستانەوە هەیە، بۆ خشتەی کای دانیشتنەکە زیاد کرا.

وێنە گەورەکە: ئەگەرچی لە دانیشتنی دوێنی پەرلەمانی عێراق بڕیاربوو دەنگ لەسەر هەمواری یاسای بودجە بدرێت، بەڵام بەشێکی زۆری پەرلەمانتارانی شیعە هۆڵی کۆبوونەوەیان جێهێشت و ڕێژەی یاساییان شکاند بۆ ئەوەی دەنگ لەسەر ئەو بڕگەیە نەدرێت.

بۆچی گرنگە: بەگوێرەی هەمواری بڕگەی (ج) ماددەی 12 لە یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش هەناردەی نەوتی هەرێمی کوردستان ڕاستەوخۆ دەستپێدەکاتەوە.

ڕاگەیێنراوی فەرمی: نووسینگەی پەرلەمانی عێراق خشتەی کاری دانیشتنی ڕۆژی سێشەممە 21-1-2025ی بڵاوکردەوە، بەگوێرەی کارنامەی دانیشتنەکە 10 بڕگە لەخۆ دەگرێت کە بریتین لە:

 

یەکەم: دەنگدان لەسەر هەمواری یەکەمی یاسای بودجەی گشتی.

دووەم: دەنگدان لەسەر پێشنیازە یاسای باری کەسیێتی ژمارە 188ی ساڵی 1959 

سێیەم: دەنگدان لەسەر پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە.

چوارەم: دەنگدان لەسەر پرۆژە یاسای هەمواری دووەمی یاسای لێبووردنی گشتیی ژمارە 27ی ساڵی 2016 

پێنجەم: دەنگدان لەسەر پێشنیازە یاسای هەمواری یەکەمی یاسای بنەماکانی هاوتاکردنی بڕوانامە و پلە زانستییەکان

شەشەم: دەنگدان لەسەر بڕیار بەشێوەی ڕاسپاردە بۆ وەزارەتی پەروەردە 

حەوتەم: دەنگدان لەسەر پرۆژە یاسای تەندروستی دەروونی

هەشتەم: خوێندنەوەی یەکەم بۆ پێشنیازە یاسای سەندیکای وەرزشوانانی عێراقی.

نۆیەم: خوێندنەوەی دووەم بۆ پێشنیازە یاسای خوێندنی باڵا-ناحکومی.

دەیەم: ڕاپۆرتی لیژنەی کاتیی پەرلەمانی بۆ بەدواداچوونی پاراستنی موڵک و ماڵی دەوڵەت.