مەسرور بارزانی بۆ دۆناڵد ترەمپ: هاوبەشی ستراتیژیمان بە پتەوی دەمێنێتەوە

ئاڤا نیوز

سەرۆکوەزیران مەسرور بارزانی پەیامێکی پیرۆزبایی ئاراستەی دۆناڵد ترەمپ دەکات و ڕایدەگەیێنێ، هاوبەشیی ستراتیژیی نێوان کوردستان و ئەمریکا و پەیوەندییەکانی نێوان گەل و هێزە چەکدارەکانی هەردوولا بە پتەوی دەمێنێتەوە.

چیرۆکی سەرەکی: دۆناڵد ترەمپ ئەمشەو لە مەراسیمێکی تایبەتدا وەک 47 ەمین سەرۆکی ئەمریکا دەستبەکار بوو، مەسرور بارزانی، سەرۆکوەزیرانی کوردستانیش لە داڤۆسی سویسراوە پەیامی پیرۆزبایی ئاراستە کرد.

پەیامی فەرمی: سەرۆکوەزیران مەسرور بارزانی لە پەیامەکەیدا دەڵێت: 

- بەبۆنەی دەستبەکاربوونی وەک سەرۆکی ویلایەتە یەکگرتووەکانی ئەمەریکا، پیرۆزبایی لە دۆناڵد ترەمپ و گەلی ئەمەریکا دەکەم.

- هاوبەشیی ستراتیژیی نێوان کوردستان و ئەمریکا و پەیوەندییەکانی نێوان گەل و هێزە چەکدارەکانمان بە پتەوی دەمێنێتەوە.

ئەوەی پێویستە بیزانیت: ئەمریکا پەیوەندییەکی بەهێزی لەگەڵ هەرێمی کوردستان هەیە و گەورەترین کونسوڵخانەی لە شاری هەولێر هەیە. لە چوارچێوەی سەرکردایەتیکردنی هێزەکانی هاوپەیمانانیش سەدان سەرباز و ڕاوێژکاری لە کوردستان هەیە، مانگانەش ملیۆنان دۆلار وەکو هاوکاری پێشکەشی هێزەکانی پێشمەرگە دەکات.