مەسرور بارزانی لەبارەی مووچە و شایستە داراییەکان: جەخت لە بەدەستهێنانی مافەكانی خەڵكی كوردستان دەكەینەوە

ئاڤا نیوز

سەرۆکوەزیران مەسرور بارزانی لە داڤۆسەوە چەند پەیامێکی نوێی ڕاگەیاند و تێیدا تیشکی خستە سەر یەکڕیزی و یەکدەنگی لە هەرێمی کوردستان. هاوکات جەختی لە بەدەستهاتنی مافە دەستوورییەكانی خەڵکی کوردستان کردەوە.

لێدوانی فەرمی: سەرۆکوەزیران مەسرور بارزانی لە چوارچێوەی کردنەوەی ماڵی کوردستان لە داڤۆسی سویسرا وتارێکی پێشکەش کرد و خۆشحاڵیی خۆی ڕاگەیاند کە دووەم ساڵە ماڵی کوردستان لە داڤۆس دەکرێتەوە.

- هیوادارم کوردستان ببێتە دەروازەیەک بۆ عێراق و ناوچەکە، تاوەکو بتوانین پێشکەوتنی ئابووریی لە ناوچەکە پەرە پێ بدەین.

- گۆڕانکاریی خێرا لە ناوچەکە ڕوو دەدەن و دەمانەوێت ڕۆڵی چارەسەر ببینین بۆ ئەوەی ناوچەکە ڕووبەڕووی شەڕی زیاتر نەبێتەوە، هاوکات هەموو هەوڵێک دەدەین بۆئەوەی لە کێشەکانی دەورووبەر تێوەنەگلێین و دیدار و سەردانمان لە ناوچەکەش هەبووە تاوەکو ئاشتی و سەقامگیری هەبێت.

- هیچ شتێک لەوە باشتر نییە کە هەرێمی کوردستان یەکڕیز و یەکدەنگ بێت، هەوڵی جددی هەیە بیروبۆچوونەکان لە یەکتر نزیک بکەینەوە.

- لەسەر داوای سەرۆک بارزانی مەزڵووم عەبدی سەردانی هەرێمی کوردستانی کرد، هاوکات سەرۆک بارزانی ڕۆڵی هەیە لە نزیککردنەوەی لایەنەکانی ڕۆژئاوای کوردستان و هیوادارین بگەنە ئەنجامێک لەگەڵ دەسەڵاتی نوێی سووریا.

- لەبارەی شایستەکانی هەرێمی کوردستان زۆر بەڵێن دراوە، هیوادارم ئەو بەڵێنانە ببن بە کردار، هاوکات جەخت لە بەدەستهێنانی مافە دەستوورییەكانی خەڵكی كوردستان دەكەینەوە.

- پیرۆزبایی لە دۆناڵد ترەمپ دەکەم و هیوادارم بتوانین پەیوەندییە ستراتیجییەکان لەگەڵ ئەمریکا پەرەپێبدەین.

بۆچی گرنگە: ماڵی کوردستان لە داڤۆس، بە ئامانجی هاندانی هاوکاری و دروستکردنی گۆڕانی ئەرێنی كراوە دەبێت. ماڵەكە پابەندە بە فراوانكردنی تێگەیشتن، فرەڕوانگەیی و دۆزینەوەی ڕێچارە بۆ ئەو ئاستەنگانەی کاریگەرییان لەسەر هەرێمی کوردستان، ناوچەکە و جیهان هەیە.