سەرۆک بارزانی لەگەڵ شاندێکی باڵای ئەنەکەسە کۆدەبێتەوە

ئاڤا نیوز

 

بڕیارە ئەمڕۆ سێشەممە، سەرۆک بارزانی لەگەڵ شاندێکی باڵای پێنج کەسی ئەنەکەسە لە هەولێر کۆببێتەوە.

 

وێنە گەورەکە: دوای کەوتنی دەسەڵاتی بەشار ئەسەد، لە چوارچێوەی سووریای نوێدا سەرۆک بارزانی دەسپێشخەریی بۆ نزیکبوونەوەی لایەنە سیاسییەکانی ڕۆژئاوای کوردستان دەستپێکرد و جارێک لەگەڵ مەزڵووم عەبدی، فەرماندەی گشتیی هێزەکانی سووریای دیموکرات کۆبوویەوە و ئەمە دووەم جاریشە لەگەڵ شاندێکی ئەنەکەسە کۆ دەبێتەوە.

 

لێدوانی فەرمی: فەیسەل یوسف، وتەبێژی ئەنەکەسە بە ئاڤا میدیای ڕاگەیاند: "دوێنی ئێوارە گەیشتووینەتە هەولێر، وا بڕیارە ئەمڕۆ لەگەڵ سەرۆک مەسعود بارزانی کۆ ببینەوە و کۆبوونەوەکەش دوای ئەوە دێت کە نوێنەری سەرۆک بارزانی لە ڕۆژئاوا سەردانی کردین، ئێمە بانگهێشتکراوین بۆ هەولێر و لێکتێگەیشتنێکی باشمان لەسەر پرسی یەکڕێزی کورد هەیە لە ڕۆژئاوا، بە تایبەت دوای کۆبوونەوەکەی سەرۆک بارزانی و مەزڵوم عەبدی".

 

لەلایەکی دیکەوە: سەرۆکوەزیران مەسرور بارزانی، لە وتارێکدا لە ماڵی کوردستان لە داڤۆسی سویسرا: سەرۆک بارزانی ڕۆڵی لە نزیککردنەوەی لایەنەکانی ڕۆژئاوای کوردستان هەیە و هیوادارین لایەنەکان بگەنە ئەنجامێک لەگەڵ دەسەڵاتی نوێی سووریا.

 

باکگراوند: ڕۆژی چوارشەممە 8ی 1ی 2025، سەرۆک بارزانی لە سەڵاحەددین پێشوازی لە شاندێکی سەرکردایەتیی ئەنەکەسە کرد، بەگوێرەی ڕاگەیێنراوێکی بارەگای بارزانیش لە دیدارەکەدا بیروڕا لەبارەی دوایین پێشهات و گۆڕانکارییەکانی سووریا و هەروەها هەڵوێستی لایەنە کوردییەکان لە گۆڕانکارییەکانی ئەم دواییە ئاڵوگۆڕ کرا.