بانکی ناوەندی وەڵامی نووسینگەکانی دابەشکردنی مووچە دەداتەوە

 

ئاڤا نیوز

بانکی ناوەندی عێراق ڕەتیدەکاتەوە داوای لە نووسینگەکانی خەرجکردنی مووچەی فەرمانبەران کردبێت مۆڵەتی نووسینگەکانیان بگۆڕن بۆ کۆمپانیا .

چیرۆکە سەرەکیەکە: بەگوێرەی میدیا عێڕاقییەکان،  بانکی ناوەندی داوای لە نووسینگەکانی خەرجکردنی مووچەی فەرمانبەران کردووە مۆڵەتی نووسینگەکانیان بگۆڕن بۆ کۆمپانیا  و هەر نووسینگەیەکیش دەبێت 250 ملیۆن دینار لەلای حکومەت وەک گەرەنتی دابنێت، خاوەن نووسینگەکانیش بڕیاری مانگرتنیان دا، بەڵام بەردەوام بوون لە کارەکانیان.

ڕاگەیێنراوی فەرمی: لەڕاگەیێنراویکدا بانکی ناوەندی عێراق ڕایگەیاند:

- بانکی ناوەندی داوای کردنەوەی نووسینگەی خەرجکردنی مووچەی فەرمانبەرانی لەو ناوچانە کردووە کە خزمەتگوزاری خەرجکردنی مووچەی فەرمانبەرانی تێدانییە نەوەک پێچەوانەکەی.

- بانکی ناوەندی کاردەکات بۆ فراوانکردنی هەموو خزمەتگوزارییەکی دارایی و خەرجکردنی مووچەی فەرمانبەران، لەوانەش لەڕێگای ئامێرەکانی (ATM) و ئامێری پارەدانی کاش (POS) لەنووسینگەکانی خەرجکردنی پارە.

لە لایەکی دیکەوە: پێش دوو ڕۆژ نوێنەرایەتی نووسینگەی دابەشکردنی مووچەی فەرمانبەرانی ڕاگەیێنراوی فەرمی بڵاوکردەوە کە لە ڕۆژی 20ـی ئەم مانگەوە مانگرتنی سەرتاسەری لە دژی لێدوانەکانی پارێزگاری بانکی ناوەندی ڕادەگەیێنن تا کاتێکی نادیار.