خاوەن نووسینگەکانى دابەشکردنی مووچە لە عێراق مانگرتنیان ڕاگەیاند

ئاڤا نیوز

ئێوارەى ئەمڕۆ لە تەواوی عێراق نووسینگەکانی خەرجکردنی مووچەی فەرمانبەران مانیان گرت، بەمەش لە عێراق کێشە بۆ دابەشکردنی مووچە دروست دەبێت.

چیرۆکی سەرەکی: فەرمانبەرانی عێراق مووچە لەڕێگەی کارتی بانکی وەردەگرن، بەهۆی کەمی نووسینگە و ئەی تی ئێمەکانی بانکەکانی ڕەشید و ڕافیدەین، نووسینگەکانی حەواڵە ئەو ڕۆڵە دەگێڕن و ئامێری ڕاکێشانی پارەیان داناوە، ئێستاش لە بڕیارێکی بانکی ناوەندی ناڕازین بۆ مانگرتنیان ڕاگەیاندووە.

ڕاگەیێنراوی فەرمی: نوێنەرایەتی نووسینگەی دابەشکردنی مووچەی فەرمانبەران نووسراوێکی بڵاوکردووەتەوە و ڕایگەیاندووە: لە ڕۆژی 20ی ئەم مانگەوە مانگرتنی سەرتاسەری لە دژی لێدوانەکانی پارێزگاری بانکی ناوەندی ڕادەگەیێنن تا کاتێکی نادیار، هاوکات نووسینگەکان داوا دەکەن لەلایەن کۆمپانیاکانەوە مۆڵەتی فەرمیان پێبدرێت.

 

هەر بەگوێرەی بڵاوکراوەکەیان، مووچە و شایستەی فەرمانبەران و خانەنشینان و چاودێری کۆمەڵایەتی دابەش ناکەن، تا ئەو کاتەی داواکارییەکانیان جێبەجێ دەکرێت و مافەکانیان جێگیر دەکرێت. 

 

ئەوەی پێشبینی دەکرێت: لە ئەگەری داخستنی نووسینگەکان، فەرمانبەران دەبێت بچنە لقی بانکەکانی ڕەشید و ڕافیدەین بۆ وەرگرتنی مووچەکانیان، بەمەش فشارێکی زۆر لەسەر ئەو لقانە دروست دەبێت و ڕووبەڕووی کێشە دەبنەوە. 

 

هۆکارە زانراوەکان: بانکی ناوەندی داوای کردووە مۆڵەتی نووسینگەکان بگۆڕدرێت بۆ کۆمپانیا، بەو پێیەش هەر نووسینگەیەک دەبێت 250 ملیۆن دینار لەلای حکومەت وەک گەرەنتی دابنێت، ئەمەش باری نووسینگەکانی قورس دەکات.