تەیف سامی ئامادەیی بۆ هاوتاکردنی مووچەی خانەنشینانی نوێ دەردەبڕێت

ئاڤا نیوز

بە بڕیاری تەیف سامی هەر فەرمانبەرێکی مەدەنی و سەربازی هەرێمی کوردستان ، ئەمساڵ خانەنشین بکرێت مووچەکەی هاوتای خانەنشینانی بەغدا دەکرێت و 12 مانگی پاداشتی خزمەت وەردەگرێت.

وێنە گەورەکە: حکومەتی هەرێمی کوردستان لەسەر بڕیاری دادگای فیدراڵی لە ناوەڕاستی ساڵی ڕابردوو دەستی بە هاوتاکردنی مووچەی خانەنشینان کرد بەهۆیەوە زۆربەی خانەنشینانی مەدەنی سوودمەند بوون و مووچەیان زیادی کرد، بەڵام حکومەتی عێراق ئامادە نییە پارە زیادەکە خەرج بکات کە مانگانە زیاتر لە 55 ملیار دینارە.

زانیاریی تایبەت: مووچەی خانەنشینان و هاوتاکردنی مووچەیان تەوەرێکی سەرەکی دوایین کۆبوونەوەی شاندی کوردستان و وەزیری دارای عێراق بووە. تەیف سامی و شاندی عێراق وتوویانە ئەو فەرمانبەرانەی ئەمساڵ خانەنشین دەبن بە فەرمانبەرانی مەدەنی و سەربازییەوە ئامادەن مووچەیان هاوتای عێراق بکەن و پاداشتی خزمەتیشیان پێبدەن بەم شێوەیە:

- ئەگەر فەرمانبەرێک 25 ساڵ خزمەتی هەبێت لە عێراق لەکاتی خانەنشینبوون 12 مووچەی بەیەکەوە پێدەدرێت، ئەگەر کەمتریش بێت شەش مووچەی پێدەدرێت.

- بۆ خانەنشینانی نوێ ئەو پارەیە دەدەن، بەڵام بۆ خانەنشینانی ساڵانی ڕابردوو، ئەو بڕە پارەیان پێنادرێت و دەبێت حکومەتی کوردستان خۆی چارەسەری بکات.

خاڵی نەرێنی: سەرچاوەیەکی تایبەت بۆ ئاڤا گوتی: ئەگەر ڕێککەوتنی نوێش بکرێت هیچ گەرەنتییەک نییە مووچەکانی ئەمساڵیش بەتەواوی بدرێن و هاوشێوەی ساڵی ڕابردوو نەبێت. لەبارەی مووچە و پاداشتی خانەنشینانیش سەرچاوەکە دەڵێت: ئەم بەڵێنانەی شاندی عێراق تەنیا قسەیە و باوڕناکرێت جێبەجێی بکرێن، ئێستا قسە دەکەن و بڕیار دەدەن، بەڵام دواتر چەندین بیانووی بۆ دەهێنێتەوە".