لە عێراق بایکۆتی دابەشکردنی مووچە دەکرێت

ئاڤا نیوز

 
بەهۆی لێدوانێکی پارێزگاری بانکی ناوەندیی عێراق،  ناڕەزایی تەواوی نووسینگەکانی دابەشکردنی مووچە و ئاڵوگۆڕی دراوی لێکەوتەوە، خاوەن نووسینگەکانیش وەک دەربڕینی ناڕەزایی بڕیاریان داوە لە رۆژی 20 مانگەوە مان بگرن و لە تەواوی عێراق نووسینگەکانیان دابخەن.

 

هۆکارە زانراوەکان: ژمارەیەک کۆمپانیا سەرەرای ئەوەی کۆمپانیاکانیان مۆڵەتی کارکردنی کی کارتیان هەیە، بەڵام بانکی ناوەندیی دان بەو مۆڵەتەدا نانێت و داوای داخستنی تەواوی ئەو نووسینگانەی کردوە کە بێ مۆڵەتن.

 

 کاریگەری و لێکەوتەکان: خاوەن نووسینگەکانی دراو و دابەشکردنی مووچە لە بەرامبەر ئەو بڕیارەی بانکی ناوەندیی بڕیاریان داوە مووچە و شایستەی دارایی فەرمانبەران دابەش نەکەن تا ئەو کاتەی داواکارییەکانیان جێبەجێ دەکرێت و بانکی ناوەندیی دانیان پێدا دەنێت.

 

ئەمەش بزانە: لە تەواوی کەرکووک 298 نووسینگەی دابەش کردنی مووچە هەیە و مانگانە فەرمانبەرانی حکومەتی عێراق لەو نوسینگانەوە موچە وەردەگرن، بەڵام ئەگەر بێت و ئەم مانگرتنە بەردەوام بێت، ئەوە فشار لەسەر بانکەکان دروست دەبێت و فەرمانبەران بۆ وەرگرتنی موچەکانیان پێویستە چەند رۆژێک لە سەرەی وەرگرتنی مووچەدا بوەستن.