دوران کاڵکان: ئەوەی عەبدوڵڵا ئۆجەڵان بیڵێت جێبەجێی دەکەین

ئاڤا نیوز

دوران کاڵکان، ئەندامی کۆمیتەی بەڕێوەبەری پەکەکە دەلێت، بۆ قۆناغی ئاشتی لە تورکیا و باکووری کوردستان تا ئێستا ئاکەپە گۆڕانکارییەکی وای نەکردووە، ئەوەی عەبدوڵڵا ئۆجەڵان بیلێت، جێبەجێی دەکەین.

وێنە گەورەکە: بەمەبەستی زیندووکردنەوەی پرۆسەی ئاشتی لە تورکیا، تا ئێستا دوو جار شاندی دەم پارتی کە پێکهاتوون لە سری سورەیا ئۆندەر، پەروین بۆڵدان و ئەحمەد تورک چوونەتە ئیمرالی و چاویان بە عەبدوڵڵا ئۆجەلان، ڕێبەری پەکەکە کەوتووە.

لێدوانی فەرمی: دوران کاڵکان بۆ میدیاکانی سەر بە پەکەکە ڕایگەیاند:

- هەوڵدەدەین هەستیاری و سەرنجڕاکێشی پێویستی پرۆسەکە نیشان بدەین. بەراستیش دەمانەوێت ئەم پرۆسەیە سەرکەوێت  کە خواستی ئۆجەڵانیشە.

- ئۆجەڵان دەیەوێت دۆخی شەڕ و ململانێ بوەستێنێت و دەرگای چارەسەری یاسایی بۆ پرسی کورد بکاتەوە. لە ئێستا و داهاتووشدا لەگەڵییداین و بەگوێرەی بڕیارەکانی ئەو دەجوڵێیینەوە.

- بە ڕای گشتی ڕایدەگەیێنین کە بە بەرپرسیارێتی خۆمان هەڵدەستین. دانوستاندکاری سەرەکیی و موخاتیبمان ئۆجەڵانە و هەموو کاتێکیش لە پشتی ئەو پرۆسەیەین.

- پشتگیری تەواوی شاندی دەمپارتی بۆ ئیمراڵی دەکەین و بەڕاستی لەگەڵ کارەکانی شاندەکەداین و باهیچ کەسێکیش نەلێت، پەکەکە پابەند نابێت، بەڵکو ئەوانەی بەڕاستی باوەڕیان بە گۆڕانکاری هەیە با هەنگاوی کردەیی بنێن و ئێمەش ئامادەیین.