سەرۆکوەزیران مەسرور بارزانی لەگەڵ وەزیری دەرەوەی سووریا کۆدەبێتەوە

ئاڤا نیوز

 

لە چوارچێوەی دیدار و کۆبوونەوەکانی  لە داڤۆس، بڕیارە ئەمڕۆ سەرۆکوەزیران مەسرور بارزانی لەگەڵ ئەسعەد شەیبانی، وەزیری دەرەوەی حکومەتی ڕاگوزەری سووریا کۆببێتەوە، پرسی کورد لە سووریاش یەکێک دەبێت لە تەوەری گفتوگۆکانیان.

 

وێنە گەورەکە: لەدوای کەوتنی ڕژێمی بەشار ئەسەد و دەستپێکردنی سەردەمێکی نوێ لە سووریا، سەرکردایەتیی سیاسیی هەرێمی کوردستان هەوڵەکانییان چڕکردووەتەوە کە کورد لە سووریای نوێ مافەکانییان پارێزراوبێت، بۆ ئەمەش هەوڵی یەکدەنگی و یەکخستنی کورد لە سووریا دەدرێت.

 

ڕاگەیێنراوی فەرمی: نووسینگەی سەرۆکوەزیرانی هەرێمی کوردستان بڵاوی کردەوە، لە چوارچێوەی دیدار و کۆبوونەوەکانی لە داڤۆس، ئەمڕۆ 23-01-2025 سەرۆکوەزیران مەسرور بارزانی لەگەڵ هەریەک لە وەزیری دەرەوەی سووریا و سەرۆکوەزیرانی کرواتیا و وەزیری ئەوروپا و کاروباری دەرەوەی فەرەنسا کۆدەبێتەوە.

 

 نووسینگەی سەرۆکوەزیرانی هەرێمی کوردستان لەبارەی تەوەرەکانی کۆبوونەوەی سەرۆکوەزیران مەسرور بارزانی و ئەسعەد شەیبانی، وەزیری دەرەوەی سووریا دەڵێت: 

 

- لەبارەی کەمکردنەوەی گرژییەکان لە ڕۆژهەڵاتی ناوەڕاست گفتوگۆ دەکەن.

 

- سەرۆکوەزیران ئامادەیی حکومەتی هەرێمی کوردستان دەخاتەڕوو بۆ هەموو هاوکارییەک لە پەرەپێدانی لێکتێگەیشتن و هاوکاری زیاتر بۆ هاتنەدی ئاشتی و ئاسایشی ناوچەکە، پەیوەست بە سووریاش لەسەر مافەکانی گەلی کورد لەو وڵاتە گفتوگۆ دەکرێت.

 

باکگراوند: لە چوارچێوەی هەوڵەکان بۆ یەکڕیزیی لایەنە کوردییەکان لە سووریا هەفتەی ڕابردوو  سەرۆک بارزانی بۆ یەکخستنی لایەنە سیاسیە کوردییەکان لە سووریا جارێک لەگەڵ مەزڵووم عەبدی، فەرماندەی گشتیی هێزەکانی سووریای دیموکرات و دوو جاریش لەگەڵ دەستەی سەرۆکایەتیی ئەنجوومەنی نیشتیمانیی کورد لە سووریا کۆبووەتەوە، لە هەموو کۆبوونەوەکانیش جەخت لەسەر پاراستنی مافەکانی کورد لە سووریا و یەکدەنگی هێزە کوردییەکان کراوە.