ناردنی لیستی مووچەی مانگی یەک بۆ بەغدا دەکەوێتە هەفتەی داهاتوو

ئاڤا نیوز

بڕیار بوو ئەمڕۆ پێنجشەممە لەسەر داواکاری بەغدا، وەزارەتی دارایی و ئابووری هەرێمی کوردستان  لیستی مووچە ڕەوانە بکات، بەڵام کەوتە هەفتەی داهاتوو.

چیرۆکی سەرەکی: وەزارەتی دارایی هەرێمی کوردستان لەسەر داواکاریی بەغدا، داوای لە سەرجەم وەزارەت و دەستەکان کرد بەخێرایی و لە ماوەی کەمتر لە 24 کاتژمێر لیستی مووچەی مانگی یەک ئامادە بکەن تا بەسیستمە نوێکە - پەیڕۆڵ، بۆ بەغدا بینێرن.

زانیاریی بەدەستهاتوو: سەرچاوەیەک لە وەزارەتی دارایی بە ئاڤا میدیای ڕاگەیاند، بەهۆی زۆریی داواکارییەکانی بەغدا، ئەمڕۆ لیستەکە تەواو نەبووە و دەکەوێتە هەفتەی داهاتوو. 

 

وەزارەتی دارایی کوردستان لەسەر داواکاریی وەزارەتی دارای عێراق بە نووسراوێکی فەرمی سێ داواکاری ئاراستەی وەزارەت و دەستەکان کردوون: 

یەکەم: لیستی مووچەی مانگی یەک بەپێی سیستمی پەیڕۆڵ ئامادە بکەن بەبێ ناوی ئەوانەی کە بڕیارە ئەمساڵ خانەنشین بکرێن.

دووەم: لیستی خانەنشینانی نوێ بە هەموو زانیارییەکانەوە ئامادە بکەن کە بڕیارە لەسەر داواکاریی بەغدا ئەم مانگە سێ موالید پێکەوە خانەنشین بکرێن و 35 بۆ 37 هەزار کەس دەگرێتەوە.

سێیەم: لیستی ئەو فەرمانبەرانەی ئەمساڵ واتا 2025 خانەنشین دەبن ئامادە بکەن، لەگەڵ میزان موراجەعە (تەرازووی پێداچوونەوە)، خەرجییەکان دەگرێتەوە.

ئەمەش بزانە: سیستمی پەیڕۆڵ سیستمێکی ئەلیکترۆنییە و یەکەمجارە حکومەتی هەرێمی کوردستان بە ئۆنڵاین لیستی مووچەی فەرمانبەران ئامادە دەکات و ئەمەش زۆر کێشە چارەسەر دەکات. 

باکگراوند: بڕیارە هەفتەی داهاتوو جارێکی تر شاندی هەرێمی کوردستان سەردانی بەغدا بکاتەوە و لەگەل وەزارەتی دارایی عێراق کۆ ببێتەوە بۆ ڕێککەوتنی نوێ لەبارەی مووچەکانی ساڵی 2025