دوو ڕاگەیێنراوی جیاواز لەبارەی کۆبوونەوەی سوودانی و شاسوار عەبدولواحید

ئاڤا نیوز

نووسینگەی سەرۆکوەزیرانی عێراق و نووسینگەی سەرۆکی جوڵانەوەی نەوەی نوێ لە بەغدا بە جیا ڕاگەیێنراویان لە بارەی ناوەڕۆکی کۆبوونەوەکەی ئەمڕۆی نێوان سوودانی و شاسوار عەبدولواحید بڵاوکردەوە، کە یەکێکیان باسی مووچە دەکات و ئەوەی دیکە بە هیچ شێوەیەک باسی مووچە ناکات. 

وێنە گەورەکە: محەممەد شیاع سوودانی، سەرۆکوەزیرانی عێراق و شاسوار عەبدولواحید، سەرۆکی جوڵانەوەی نەوەی نوێ لە بەغدا کۆبوونەوە، کۆبوونەوەکەش لە ئۆفیسی نەوەی نوێ کراوە و سوودانی سەردانی شاسوار عەبدولواحیدی کردووە. هەردوولا ڕاگەیێنراویان لەبارەی ناوەڕۆکی کۆبوونەوەکە بڵاوکردووەتەوە، بەڵام ڕاگەیێنراوی هەردوولا لەبارەی مووچەوەزۆر جیاواز بووە.

ڕاگەیێنراوی فەرمی: نووسینگەی شاسوار عەبدولواحید ڕایگەیاند: لە کۆبوونەوەکەدا مووچەی خەڵکی کوردستان و دۆخی سیاسی هەرێم و عێراق و دوایین پێشهاتە سیاسییەکان تاوتوێکراون. سوودانی لەبارەی مووچە گوتوویەتی ئەمساڵ مووچەی مووچەخۆرانی هەرێم دەنێردرێت و مەترسی لەسەر نییە.

بۆچوونی لایەنی بەرامبەر: نووسینگەی سوودانی بڵاویکردووەتەوە؛ لە کۆبوونەوەکەدا کۆمەڵێک دۆسیە لەسەر ئاستی نیشتمانی تاوتوێ کراون، یەکێک لەوانە پێکهێنانی کابینەی 10ی حکومەتی هەرێمی کوردستان بووە و سەرۆکوەزیرانی عێراق جەختی لەسەر گرنگی پاڵپشتیکردنی گفتوگۆی نێوان هێزە سیاسییەکان لە هەرێمی کوردستان کردووەتەوە. لە ڕاگەیێنراوەکەی سوودانیدا تەنانەت بە یەک وشەش باسی مووچە نەکراوە.

نووسینگەی سەرۆکوەزیرانی عێراق و نووسینگەی سەرۆکی جوڵانەوەی نەوەی نوێ لە بەغدا دوو ڕاگەیێنراوی جیاوازیان بڵاوکردەوە