ئاڤا بە دواداچوون بۆ بڕیاری دامەزراندنی 500 کەس دەکات لە پارێزگای هەڵەبجە

ئاڤا نیوز 

 

ساڵی ڕابردوو سەرۆکوەزیران مەسرور بارزانی، سەردانی پارێزگای هەڵەبجە کرد و لە میانەی سەردانەکەیدا نۆ داواکاری ئاڕاستەی سەرۆکوەزیران کران و یەکێک لە داواکارییەکان دامەزراندنی میلاک بوو بۆ پارێزگای هەڵەبجە.

 

چیرۆکی سەرەکی: دوای ئەوەی سەرۆکوەزیران لە 22-02-2024، سەردانی پارێزگای هەڵەبجەی کرد و بەردی بناغەی پردی تووەقووتی دانا، لە 30-06-2024 بۆ دووەمجار سەردانی پارێزگای هەڵەبجەی کردەوە و بەردی بناغەی سایلۆی هەڵەبجەی دانا، لە سەردانی یەکەم داواکاری دامەزراندنی 500 کەس کرا وەکو میلاک و هەر ئەوکات بڕیاری جێبەجێکردنی بۆ دەرکردن.

 

لێدوانی فەرمی: ئازاد تۆفیق، پارێزگاری هەڵەبجە، بە ئاڤا میدیای ڕاگەیاند: بڕیاری دامەزراندنی 500 کەس وەکو میلاک ڕاستە بەڵام تا ئێستا ناوەکان نەگەیشتوونەتە دیوانی پارێزگای هەڵەبجە، چاوەڕوانین لەوانەیە ڕۆژی یەکشەممە بگات، لە ئەگەری گەڕانەوەی ناوەکان ئێمە لە ڕێگەی پەیجی فەرمی دیوانی پارێزگای هەڵەبجە، سەرجەم ناوەکان بڵاودەکەینەوە.

 

لەلایەکی دیکەوە: کاوە عەلی، جێگری پێشووی پارێزگاری هەڵەبجە، بە ئاڤا میدیای ڕاگەیاند: لە ئەنجوومەنی ڕاژە پێیان ڕاگەیاندووین ناوەکان تەواو کراوە ئاڕاستەی ئەنجوومەنی وەزیران کراوە و ئەنجوومەنی وەزیرانیش ئاڕاستەی پارێزگای هەڵەبجە دەکات، لە نزیکترین کاتدا دەگاتە دیوانی پارێزگا و کارەکانی تەواو کراوە.