ئاڤا بەدواداچوون بۆ ئەو خانەنشینانە دەکات کە لە دەرەوەی وڵاتن و بایۆمەتریان نەکردووە

ئاڤا نیوز

ژمارەیەکی زۆر خانەنشینی مەدەنی و سەربازی ماون کە پرۆسەی بایۆمەتری و مامەڵەی ژمارەی وەزیفی بکەن، بەو هۆیەوە چەند مانگێکە مووچەیان ڕاگیراوە و تا ئەو مامەڵانە تەواو نەکەن مووچەکانیان ڕادەگیرێت، بەڵام نافەوتێت.

لێدوانی فەرمی: گۆرکیس دنحا برایمۆک، مامۆستایەکی خانەنشینە کە دوای 38 ساڵ و چوار مانگ  خزمەت لە هەولێر خانەنشین بووە و ئێستا لە وڵاتی ئەمریکا نیشتەجێیە، بۆ ئاڤا میدیا دەڵێت:

- ئێستا ناتوانم بگەڕێمەوە هەرێمی کوردستان، بەهۆی ئەوەی تەنیا گرین کاردم هەیە و هێشتا ڕەگەزنامەی ئەمریکام پێنەدراوە، ئەگەر بێمەوە کوردستان جارێکی دیکە ناتوانم بگەڕێمەوە ئەمریکا.

- پرسیارم لە باڵیۆزخانەی عێراق لە ئەمریکا و نوێنەرایەتیی هەرێمی کوردستان لەو وڵاتە کردووە و پێیان وتووم کار ئاسانی بۆ ئەوانەی وەک ئێوە کراوە تەنیا کەفیل و شەهادەی ژیاننامە و وێنەتان هەبێ، هەروەها کەفیلێک داوا (صورة القيد الالكترونية) لە فەرمانگەی باری شارستانی يان بانک بکات کە ئەوە لە جیاتی کارتی نیشتمانی و بایۆمەترییە،  بەمە مووچەکەتان تاوەکو 10 ساڵی دیکە خەرج دەکرێت.

- ئەو مامۆستایە گوتیشی، ئێستا تەمەنم 78 ساڵە و تەندروستیم باش نییە و پێویستیم بە چاودێری تەندروستی هەیە، داواکارم ئێوە سۆراخی ئەو مووچەیەم بکەن.

زانیاریی تایبەت: دوای بەدواداچوونی ئاڤا میدیا، وەزارەتی دارایی عێراق بە ئاڤای ڕاگەیاند: هەر مووچەخۆرێک بایۆمەتری نەبێت ناوەکەی بۆ ئێمە مەنێرن و مووچەی خەرج ناکەین تاوەکو بایۆمتری دەکات، تەنانەت لیستی مووچەی مانگی یەک لەسەر بوونی چەند ناوێک کە بایۆمتریان نییە گەڕێنرایەوە و گوتیان ئەو ناوانە لادەن تاوەکو بایۆمەتری دەکەن.

ئەوەی پێویستە بیزانیت: بایۆمەتری پرۆسەیێکە پێویستی بە وێنەی ئەلیکترۆنی و پەنجەمۆری خودی مووچەخۆرەکە هەیە، ئەمە ڕێنمایی و مەرجی وەزارەتی دارایی عێراقە و دەبێ جێبەجێ بکرێت، ئەگینا مووچەکەی خەرج ناکرێت، هیچ ئاسانکارییەکیش لەسەر نەکردنی بایۆمەتری نەکراوە.