بۆ کۆماری نەڕوخاوو، مەسیحە زیندووەکەی کورد

ئاڤا نیوز

 

بۆ کۆماری نەڕوخاوو، مەسیحە زیندووەکەی کورد

 

بۆ  21\1 ساڵڕۆژی دامەزراندنی کۆماری کوردستان

ئەی خودایە
چەند ناسك بوو
نێرگزی چەکەرە کردووی
ژێر داروپەردووی زۆرداری
چەندە پەریا و هەست گەرم بوو
بووکی جووانی سەربەخۆیی
ژێر دەواری کوردەواری
کۆمار کۆڵوانەی شەرەفی
پشتی دایکی نیشتمان بوو
خەونی بەرجەستەی کوردان و
سمکۆو مەلیک و پیران بوو
بۆسەر کێڵگەی کەرامەتمان
گریانی خۆشی ئاسمان بوو
قەڵەمی دەستی قوتابی و
گۆچانی دەستی باپیرە و
چاوی هیوای تازە لاو و
خەندەی لێوی هەژاران بوو.
لەوساتانەی مێژووی ڕۆحمان
موکریان مەڵبەندی عەشق و
گەورەبوونی ڕۆحی کورد و
گۆڕی شەهید 
گووڵباران بوو
مهاباد
چیدی شار نەبوو
ترپەی دڵی کوردستان بوو
لە مزگەوتی سوور بانگییەدا
لە لوڕستان تاکو ورمێ
لە ئامەد تاکو قامیشلۆو 
سلێمانی،
سپێدەی عەشق و هەڵسان بوو
کاتی نوێژی 
سەرمەستان بوو.
بۆیە کاتێ 
گڕ لەچووار چراش بەردرا
پەتی کینە بەگەردنی
مەسیحەکەی کوردا کرا
خۆر زۆر گریا بەسەرمانا
بۆ دڕانی کەواو سەڵتە و
مورادخانی
سەربەخۆیی لەبەرمانا
لەوکاتەوە
ڕۆژێ نییە هەڵهاتبێ و
بۆم ماتەمە
فرمێسکی لە چاوا نەبێ
زەردەپەڕی ئێوارانیش
لە کانی چاوی کوردستان
دەستنوێژ نەگرێ و
لە عوزرخوواهی تەمەنی
کوورتی کۆمار،
بەشەرمەوە ئاوانەبێ
بەڵێ لالۆ
ڕاستە کۆمار و پێشەوا
لە سەفەرن و
لە چاو ونبوون
بەڵام ڕۆژێ هەردێنەوە
چوونکە خدری زیندەی کورد و
لە دڵی میللەتا زیندوون.
هەڵۆیەکی برینداری 
قەت نەسرەوتوون
تۆوی خەونی ئازادین و
چاوەڕێی وەرزی بەهاری
کوردستانی ڕاپەڕیون
بۆ سەوز بوون.
بۆیە لالۆ
گوێ مەگرە لەو دەنگۆیانەی 
دەڵێن کەوا
لە زستانی ڕقا تیاچوون.
نانا لالۆ
لە ناو ماڵی 
ڕۆحی مێژووی
کووردا خەوتوون.
ماخۆلانێکی پیرۆزن 
لەسەرمانا
مژدەی ئاسۆی سبەینێن و
تەمی هەناسەی دەریان و
هاکا ڕۆژێ لەگەڵ باران
بارینەوە بەسەرمانا
بارینەوە بەسەرمانا

ئەبوبەکر کاروانی

سلێمانی
٢٠٢٥/١/٢٣