پۆلیسی ڕاپەڕین لەبارەی کوژرانی کارمەندێکی دژەتیرۆر ڕوونکردنەوە دەدات

ئاڤا نیوز

 

پۆلیسی ڕاپەڕین ڕایگەیاند، فەرمانی دەستگیركردن بۆ تۆمەتبارانی شەڕەكەی ئەمڕۆی ڕانیە دەرچووە و ئاماژە بەوەشدەكات، بریندارەكان بەهۆی سەختی برینەكانیانەوە، ڕەوانەی شاری سلێمانی كراون.

وێنە گەورەكە: كاتژمێر 1:00ـی بەرەبەیانی ئەمڕۆ، شەڕە تەقە لەنێوان دوو قوتابی لاو و دوو كاسبكار ڕوویداوە و بەهۆیەوە بە سەختی بریندار دەبن و یەكێك لە بریندارەكانیش كە لەهەمان كاتدا كارمەندی دژە تیرۆرە، بەهۆی زۆری برینەكەی گیانی لەدەستداوە. 

 

ڕاگەیێنراوی فەرمی: بەڕێوەبەرایەتیی پۆلیسی راپەڕین لە ڕوونکردنەوەیەکدا پشتڕاستی دەكاتەوە، لە شەڕەکەی بەرەبەیانیی ئەمڕۆی ڕانیە، سێ گەنج بە گولـلە بریندار بوون و کەسێکی دیکەش بەهۆی سەختی برینەکەوە گیانی لەدەستداوە، بە بڕیاری دادوەری لێكۆڵینەوە و پاڵپشت بە ماددەكانی 405 و 406 بڕگە 31 لە یاسای سزاكانی عێراقی، فەرمانی دەستگیركردن بۆ تۆمەتبارانی ڕووداوەكە دەرچووە. 

 

ئەوەشی خستووەتەڕوو کە دوای شەڕەكە بریندارەكان خێرا گەیێنراونەتە نەخۆشخانەی گشیی ڕانیە و چارەسەری سەرەتاییان پێدراوە، بەڵام بەهۆی سەختی برینەکانیانەوە، ڕەوانەی سلێمانی کراون، یەكێك لە بریندارەكان لەڕێگەی نێوان ڕانیە-سلێمانی بەهۆی كاریگەربوونی بە برینەكەی، گیانی لەدەستداوە.