فێستیڤاڵی فیلمی سەندانس دەستپێدەکات

ئاڤا نیوز

ئاگرە گەورەکەی لۆس ئەنجڵس زیانی زۆری بە کەش و هەوای شارەکە گەیاند، لەگەڵ ئەوەشدا زۆرێک لە فێستیڤاڵ و بۆنەکان دواخران تاوەکو دۆخەکە کەمێک ئارام بێتەوە، بەڵام فێستیڤاڵی فیلمی سەندانس لە ویلایەتی یوتا چەند ڕۆژێکە دەستیپێکردووە.

چیرۆکی سەرەکی: فێستیڤاڵی فیلمی سەندانس لە ویلایەتی یوتا بۆ ماوەی 11 ڕۆژ لە 23ـی کانوونی دووەم تا 2ی شوبات دەخایەنێت، تێیدا 90 فیلم نمایش دەکرێن و ژمارەیەک ئەستێرە ئامادە دەبن وەک جێنیفەر لۆپێز، کۆنان ئۆبراین، ئۆلیڤیا کۆڵمەن، ئێمیلی واتسن و کۆمەڵێک ئەستێرەی دیکە. لە کۆتایی فێستیڤاڵەکەدا باشترین فیلم لە نێو هەموو فیلمەکان دیاری دەکرێت و خەڵات دەکرێت.

زانیاریی زیاتر: فێستیڤاڵی فیلمی سەندانس، 46 ساڵ لەمەوبەر، وەکو بەشێک لە فێستیڤاڵی فیلمی ویلایەتی یوتا سەریهەڵداوە، لەلایەن پەیمانگەی سەندانسەوە رێکخستن و میوانداریی بۆ دەکرێت، فێستیڤاڵەکە تیشک دەخاتە سەر دۆزینەوەی چیرۆکی نوێ و دەرخستنی ئەو کەسایەتییانەی، لە ئاستی بەرهەمهێنانی فیلمدا چاوەڕێی داهاتووی پرشنگداریان لێدەکرێت.