ئاڤا وادەی چوونی شاندی کوردستان لەبارەی مووچە بۆ بەغدا ئاشکرا دەکات

ئاڤا نیوز

بەهۆی تەواونەبوونی لیستەکانی مووچە و خانەنشینان و داواکارییەکان، سەردانی شاندی باڵای کوردستان لەبارەی مووچە بۆ بەغدا دەکەوێتە هەفتەی داهاتوو.

ئەوەی ئێستا ڕوودەدات: هەردوو شاندی عێراق کە هی وەزارەتی داریی و بەڕێوەبەرایەتیی خانەنشینین، هەفتەیەکە لە هەولێرن و لەگەڵ تیمە تەکنیکییەکانی وەزارەتی دارایی و ئابووریی کوردستان بۆ ئامادەکردنی لیستی مووچەی مانگی یەک، لیستی خانەنشینان و تەرازووی پێداچوونەوە (میزان موراجەعە) بەردەوامن.

 

ئەوەی پێویستە بیزانیت: بڕیار بوو یەکشەممەی ڕابردوو شاندی کوردستان بۆ دووەمجار سەردانی بەغدا بکەنەوە و لەگەڵ ئەنجوومەنی ئابووریی عێراق و تەیف سامی، وەزیرەی دارایی کۆببنەوە، بەڵام بەهۆی تەواونەبوونی کارەکان سەردانەکە دواکەوت، تاوەکو ئێستاش ڕوون نییە بەدیاریکراوی چ ڕۆژێک دەچن.

 

زانیاریی تایبەت: سەرچاوەیەکی باڵا لە وەزارەتی دارایی و ئابووریی کوردستان بە ئاڤای وت، "گەڕانەوەی شاندەکانی عێراق بۆ هەفتەی داهاتوو دوادەکەوێت، تا ئەوکات سەرجەم ڕێکارە تەکنیکییان و داواکارییەکان تەواو دەکەن."

 

ئەوەی پێشبینی دەکرێت: چاوەڕوان دەکرێت ڕۆژی شەممە 1-2-2025 شاندەکانی عێراق بگەڕێنەوە بەغدا، ڕۆژی یەکشەممە شاندی باڵای کوردستان  سەردانی بەغدا بکەن و لەگەڵ خۆیان لیستەکانی مووچە و خانەنشینی بکەن و گفتوگۆ لەبارەی ڕێککەوتنێکی نوێ بکەن بۆ خەرجکردنی مووچەی خەڵکی کوردستان.