وتەبێژی ئەپیکۆر بۆ ئاڤا: کۆنگرەی عێراق بۆ وزە دەرفەتێکی زۆر گرنگە بۆ وەبەرهێنان

 

ئاڤا نیوز

وتەبێژی ئەپیکۆر دەڵێت، کۆنگرەی عێراق بۆ وزە کە بڕیارە سبەینێ کارەکانی لە بەغدا دەستپێبکات، بۆ وەبەرهێنان و پێشخستنی کەرتی نەوت دەرفەتێکی گرنگە و ئەوەش لە بەرژەوەندی هەموو هاووڵاتیانی عێراق دایە.

چیرۆکی سەرەکی: ڕۆژانی 28 و 29ی ئەم مانگە و بە بەشداریی 400 کەسایەتی سیاسی، خاوەن کۆمپانیا و و گەورە شارەزای بواری وزە، لە بەغدا "کۆنگرەی عێراق بۆ وزە" بەڕێوەدەچێت، پرسی نەوتی هەرێمی کوردستان و چارەسەرکردنی کێشەکانی نێوان هەولێر و بەغداش تەوەرێکی سەرەکی کۆنگرەکە دەبێت.

لێدوانی فەرمی: مایڵز کاگینز، وتەبێژی کۆمەڵەی پیشەسازیی نەوتی هەرێمی کوردستان (ئەپیکۆر) لە میانەی بەشداریکردنی لە گەشتی هەواڵەکانی کاتژمێر 1:00ی ئاڤا میدیادا ئاماژەی بەوەکرد، "کۆنفرانسی وزە کە لە بەغدا بەڕێوەدەچێت زۆر گرنگە، چونکە نوێنەرایەتی سیاسەتی بەغدا دەکات و پەیامێکیشە بۆ ڕایگشتی کە داهاتی وزە بۆ هەموو کەسێکە لە بەسڕەوە بۆ چۆمان و چەمچەماڵ و ئەنبار، ئەم داهاتە بۆ هەموو خەڵکی عێراقە بەتایبەتیش کاتێک ئەم کەرتە لە وڵاتەدا بەهێز دەبێت و کۆمپانیا نێودەوڵەتییەکان لە وەبەرهێنان لەم بوارەدا بەشدار دەبن".

مایڵز کاگینز، وتەبێژی کۆمەڵەی پیشەسازیی نەوتی هەرێمی کوردستان (ئەپیکۆر) وتیشی:

- هەوڵدەدەین نەوت لەڕێگەی کۆمپانیای سۆمۆوە بفرۆشین

- دوای ڕێککەوتنی نوێ، هەناردەی نەوتی کوردستان دەستپێدەکەینەوە

- هیچ کۆمپانیایەکی نەوتی ئەمریکا لە ڕۆژئاوای کوردستان و سووریادا کارناکات

- تێچووی بەرهەمهێنانی نەوتی کوردستان لە کێڵگەیەکەوە بۆ کێڵگەیەکی دیکە جیاوازە

- زیانی ڕاگرتنی هەناردەی نەوتی هەرێمی کوردستان زیاتر لە 23 ملیار دۆلارە