بڕیارێکی دیکەی بەغدا لە هەرێمی کوردستان جێبەجێ دەکرێت

 

ئاڤا نیوز

وەرگرتنی ڕسومات لە سەرجەم بەڕێوەبەرایەتییەكانی ڕەگەزنامە و کارووباری باری شارستانیی پارێزگاكانی هەرێمی كوردستان، دەبێتە ئەلیكترۆنی و هاووڵاتیان دەبێت لەڕێگەی پارەدانی ئەلیكترۆنییەوە بە ئامێری 'POS' ڕسوومات بدەن.

وێنە گەورەکە: لە بەردەوامی هەنگاوەکان بۆ بە ئەلیکترۆنیکردنی مامەڵەکان لە دامودەزگا حكومییەكان، بەپێی بڕیارێكی ڕەگەزنامەی گشتیی هەرێمی كوردستان، لە سەرەتای مانگی داهاتووەوە، پارەی ڕسووماتی ڕاییكردنی مامەڵەكانی بەڕێوەبەرایەتییەكانی كارتی نیشتیمانی و ڕەگەزنامە و باری شارستانی، لە پارەدانی كاشەوە دەبێتە كارتی بانكی كە لەڕێگەی ڤیزا كارت یاخود ماستەر كارتەوە دەبێت و بڕیارەكەش ئیجبارییە و وادەكە نوێ ناكرێتەوە.

لێدوانی فەرمی: عەمید عەبدوڵڵا محەممەد، وتەبێژی بەرێوەبەرایەتیی ڕەگەزنامە و باری شارستانیی دهۆک بە ئاڤا نیوزی ڕاگەیاند، "سەرەڕای ئەوەی بەڕێوەبەرایەتییەكەمان ماوەیەكی زۆرە مامەڵەكانی خەڵک و داخیلكردنی داتا و زانیارییەکانیان بە شێوازی ئەلیکترۆنی بەڕێوە دەبات، بەڵام بڕیارێك لە بەڕێوەبەرایەتی گشتیی ڕەگەزنامەی بەغداوە دەرچووە كە دەبێت لە ڕێككەوتی 2025-2-1ـەوە ڕسومات بەشێوەی پارەدانی ئەلیكترۆنی لە هاووڵاتیان وەربگیرێت لەڕێگەی ئامێری 'POS' .

ئەوەی پێویستە بیزانیت: هەر ئەندامێكی خێزانێك كارتی بانكی هەبێت دەتوانێت لەجیاتی سەرجەم ئەندامانی خێزانەكە بە كارتەکە پارەی ڕسوومات بدات بەو مەرجەی كارتەكە لەلایەن بانكی ناوەندی عێراقەوە باوەڕپێكراو بێت.

باكگراوند: هەرچەندە پارەدانی ئەلیكترۆنی لە بەڕێوەبەرایەتییەكانی ڕەگەزنامە و باری شارستانی لە 2024-12-1ـەوە كاری پێدەكرێت، بەڵام بەڕێوەبەرایەتی گشتیی ڕەگەزنامەی عێراق جەختی كردۆتەوە لەوەی، دوای ڕێكەوتی 2025-2-1 هیچ مامەڵەیەك بە پارەدانی كاش ڕایی ناكرێت.