ئاڤا بەدواداچوون بۆ کێشەکانی گەڕەکی تووەسپی لە سلێمانی دەکات

 

ئاڤا نیوز

دانیشتوانی گەڕەکی تووەسپی لە سلێمانی داواکاری و سکاڵایان گەیاندووەتە ئاڤا، دەڵێن گرفتاری  چەندین کێشەن، نە خانووەکانیان لەسەر تاپۆ دەکرێت و نە خزمەتگوزارییان پێدەگات.

چیرۆکی سەرەکی: گەڕەکی تووەسپی لە سلێمانی بە پێی گوتەی موختاری گەڕەکەکە لە ساڵی 2008ـەوە خەڵک بە زیادەڕۆیی خانووی لەو ناوچەیە دروست کردووە، ئێستا دانیشتووانی گەڕەکەکە چوار هەزار ماڵی تێپەڕاندووە و داوای تاپۆکردنی خانووەکانیان و خزمەتگوزاری دەکەن.

زانیاریی زیاتر: بە پێی بەدواداچوونەکانی ئاڤا، کێشە و داواکارییەکانی ئەو گەڕەکە بەدیاریکراوی ئەمانەن:

- گەڕەکەکە لە بەڕێوەبەرایەتیی گشتیی شارەوانییەکان بگوازرێتەوە بۆ شارەوانی سلێمانی

- خانووەکانیان بۆ تاپۆ بکرێت، هاوکات خزمەتگوزاریشیان بۆ ببرێت

- ئەوەی لەم ماوەیە دیواری حەوشەی ماڵەکەی بۆیاغ کردبێت، کارەبای مۆلیدەیان لێ بڕیووە و دەڵێن نابێ هیچ دەستکارییەکی بکەن.

زانیاریی تایبەت: بڕیاردراوە سێ ناوچەی سلێمانی کە بە تەجاوز دروستکراون لەناویاندا تووەسپی هەیە، بخرێنە سەر شارەوانی سلێمانی، ئێستا لیژنەی بۆ دروستکراوە و چەند ڕێکارێکی کەمی ماوە ئیدی شارەوانی تووەسپی لە بەڕێوەبەرایەتی گشتیی شارەوانییەکانەوە دەگوازرێتەوە بۆسەر شارەوانی سلێمانی و ئەو کاتە باشتر دەتوانرێت خزمەتگوزارییان پێبگات.

لێدوانی فەرمی:  پێشڕەو عومەر، سەرۆکی شارەوانی تووەسپی، بە ئاڤا میدیای ڕاگەیاند: لە 2023ـەوە نووسراومان بۆ وەزارەتی شارەوانی کردووە، لەبارەی بەخاوەنکردن و پێشنیازمان کردووە بە ماددەی 34 مامەڵە لەگەڵ ئەم زەویانە بکرێت بۆ ئەوەی پرۆسەی تاپۆکردنی تووەسپی خێراتر بکەین، بەڵام وەزارەتی شارەوانی وەڵاممان ناداتەوە. ئەگەرچی چوار بۆ پێنج جاریش جەختکردنەوەمان لەسەر نووسراوەکە کردووە.

ئەو زەوییانە بەناوی وەزارەتی دارایی و شارەوانین، هەر گۆڕینی خاوەنداریەتییەکە لەو دوو وەزارەتە بۆ وەزارەتی شارەوانی بگۆڕدرێت کاتێکی زۆری پێویستە، ئەمە میکانیزمێکی ئاڵۆزە و کاتی دەوێت.

ئەوەی ئێستا ماوەتەوە لە دەسەڵاتی ئەنجومەنی وەزیرانە، بڕیاری تاپۆکردن بدات و بە زووترین کات ئەوە ئەنجام بدرێت.

سەبارەت بە کێشەی خزمەتگوزاری، پێشڕەو عومەر دەڵێت: 

لە هەفتەی داهاتووەوە دەستدەکرێت بە دانانی ماستەپلانی تووەسپی، دواتر نەخشەی کەرتی ئامادە دەکرێت. ئینجا ئەو خانووانەی ڕێگرنین لەبەردەم نەخشەی ماستەرپلانەکە دەتوانرێت مامەڵەی تاپۆکردنیان بۆ ڕایی بکرێت. ئێستا 70%ـی کارەکانی تەواو کراوە.

 

 

گوتیشی: ئێستا لە تووە سپی یەک مەتر زەویت دەستناکەوێت مردووی تیا بنێژیت، یەک مەتر نەماوە بیکەین بە قوتابخانە، نەخۆشخانە، باخچە.