گرێبەستێک وەزیری پەیوەندییەکانی عێراق دووچاری لێپرسینەوە دەکات

ئاڤا نیوز

 

لیژنەی پەیوەندییەکانی پەرلەمانی عێراق ئاشکرای دەکات، بەهۆی گرێبەستێکی گوماناوییەوە لێپرسینەوە لە وەزیری پەیوەندییەکان دەکرێت و ئەگەری لە کار دوورخستنەوەی هەیە.

 

وێنە گەورەکە: لیژنەی پەیوەندییەکانی پەرلەمانی عێراق، واژۆی زیاتر لە 90 پەرلەمانتاری کۆکردۆتەوە بۆ لێپرسینەوە لە هویام یاسری، وەزیری پەیوەندییەکانی عێراق، بەهۆی گرێبەستێکەوە کە لەگەڵ کۆمپانیای ئای کیو کردوویەتی.

 

لێدوانی فەرمی: زەهرا بجاری،  سەرۆکی لیژنەی پەیوەندییەکان لە پەرلەمانی عێراق ڕایگەیاند: 

-لیستێکمان ئامادەکردووە بۆ لێپرسینەوە لە هویام یاسری، وەزیری پەیوەندییەکان بەهۆی تازەکردنەوەی گرێبەستێک لەگەڵ کۆمپانیای IQ  کە پێشتر لەلایەن خودی وەزارەتەوە کراوەتە لیستی ڕەشەوە.

 

-ڕەنگە بەتۆمەتی خراپ بەكارهێنانی دەسەڵاتەكانی، پەرلەمانی عێراق بە زۆرینەی دەنگی پەرلەمانتاران متمانە لە هویام یاسری، وەزیری پەیوەندییەکان وەرگرێتەوە و لەپۆستەکەی دوریخاتەوە.

 

هۆكاره‌ زانراوه‌كان: پەرلەمانتار حەنان فەتلاوی، سەرۆکی بزووتنەوەی ئیرادە، ئاشکرایکرد، هویام یاسری، وەزیری پەیوەندییەکان جارێکی دیکە گرێبەستی لەگەڵ کۆمپانیایەک کردووە، توانای ئینتەرنێتی بە قاچاخ فرۆشتووە و زیانی نزیکەی 991 ملیار دیناری بە دەوڵەت گەیاندووە.

 

لەلایەکی دیکەوە: وەزارەتی پەیوەندییەکانی عێراق ئەو زانیاریانەی کە پەرلەمانتار حەنان فەتلاوی، سەبارەت بە گرێبەستێکی نوێ لەگەڵ کۆمپانیای ئای کیو ڕەتدەکاتەوە  و دەڵێت، کۆمپانیاکە لە ساڵی 2010 گرێبەستێکی وەبەرهێنانی لەگەڵ وەزارەتەکەیان هەیە و تاوەکو ئێستا بەردەوامە، هاوکات پێشتریش دادگا دۆسییەی قاچاخچێتى تۆڕی ئینتەرنێتی بەقازانجی کۆمپانیای ئای کیو یەکلاکردووەتەوە.