300 مامۆستای ئایینیی پێکەوە خانەنشین دەبن

ئاڤا نیوز

 

بەهۆی جێبەجێکردنی یاسای خانەنشینیی یەکگرتوو، لە هەرێمی کوردستان 300 مامۆستای ئایینیی خانەنشین دەکرێن، وەزارەتی ئەوقافیش دەڵێت، پلانیان هەیە بە مامۆستایی ئایینیی خۆبەش شوێنیان پڕ بکەنەوە.

 

وێنە گەورەکە: پێشتر بەپێی یاسا، مامۆستایانی ئایینی تا تەمەنی 70 ساڵی خانەنشین نەدەکران، بەڵام کە بڕیاردرا یاسای خانەنشینی یەکخراو لە هەرێمی کوردستان جێبەجێ بکرێت، ئیدی تەمەنی خانەنشینی مامۆستایانی ئایینیش وەک فەرمانبەرانی لێهات، واتە لە تەمەنی 60 ساڵی خانەنشین دەبن، بەو پێیەش 10 تەمەن لە مامۆستایانی ئایینی بەسەر یەکەوە خانەنشین دەبن.

 

لێدوانی فەرمی: سەرچاوەیەک لە وەزارەتی ئەوقاف و کاروباری ئایینیی هەرێمی کوردستان بە ئاڤا میدیای ڕاگەیاند،: لە هەرێمی کوردستان دوو هەزار و 700 مامۆستای ئایینیی  هەیە، لەو ژمارەیە زیاتر لە 300 مامۆستای ئایینیی لە هەموو هەرێمی کوردستان خانەنشین دەبن، تەنیا لە سنووری هەولێر 59 مامۆستا خانەنشین دەبن.

 

چارەسەرەکان: بۆ پڕکردنەوەی شوێنی ئەو مامۆستا ئایینییانە، وەزارەتی ئەوقاف هەزار و 500 مامۆستای ئاینی خۆبەخشیان هەیە کە هەریەک لەو مامۆستایانە مانگانە 250 هەزار دیناریان پێ دەدرێت، ئەوان دەبنە شوێنگرەوەی ئەو مامۆستا ئایینیانەی خانەنشین دەبن.

 

ئەمەش بزانە: لە هەرێمی کوردستان، شەش هەزار و 100 مزگەوت هەیە، لەو ژمارەیە سێ هەزار و 800 مزگەوت وتاری ڕۆژانی هەینی لێ دەخوێندرێتەوە.