فەرهاد پیرباڵ خانەنشین دەبێت

ئاڤا نیوز

 

لە زانکۆی سەڵاحەدین 396 فەرمانبەر و مامۆستا خانەنشین دەبن، لەو ناوانەی دەست ئاڤا میدیا کەوتوون، ناوی د.فەرهاد پیرباڵ هەیە کە خانەنشین دەبێت.

 

وێنە گەورەکە: بەپێی یاسای خانەنشینی یەکگرتووی عێراق، ئەمساڵ ئەوانەی تەمەنیان گەیشتووەتە 60 ساڵ خانەنشین دەبن، ئەوانەشی پلەی پڕۆفیسیۆر و پڕۆفیسۆری یاریدەدەریان هەیە لە تەمەنی 63 ساڵی خانەنشین دەبن.

 

لێدوانی فەرمی: د.فەرهاد پیرباڵ، نووسەر و مامۆستای زانکۆ بە ئاڤا میدیای وت: "هەواڵی خانەنشین بوونم لە ئێوە زانیوە، هەر بڕیارێک حکومەتی هەرێمی کوردستان بیدات بۆ ڕێکخستنەوەی کارگێڕی پێیەوە پابەند دەبم".

 

داواکاریی تایبەت: د.فەرهاد پیرباڵ تەنیا یەک داواکاری هەیە و دەڵێت: بەشی فەرەنسی لە کۆلیژی ئاداب پێویستیان بە مامۆستا هەیە، داوا دەکەم چەند ساڵێک خزمەتی ڕاژەکەم بۆ درێژبکەنەوە و لەوێ وانە بڵێمەوە، چونکە کونسوڵخانەی فەرەنسا هەموو هاوکارییەکی لەسەر ئەو بەشە بڕیوە و مامۆستایان کەم بووەتەوە.

 

ئەمەش بزانە: بڕیارە سبەی چوارشەممە زانکۆی سەڵاحەدین لە سەنتەری ڕۆشنبیری و کۆمەڵایەتی زانکۆ، لە مەراسیمێک سوپاس و پێزانین بەوانە ببەخشێت کە لەم زانکۆیە خانەنشین دەبن.

 

ئەوەی پێویستە بیزانیت: د.فەرهاد پیرباڵ، نووسەری هەرە دیاری کوردستانە، لە بوارەکانی ئەدەب، فەلسەفە، زمان و هونەر دەیان بەرهەمی هەیە. لە دایکبووی 20ـی ئابی 1961 لە شاری هەولێرە.