کۆمپانیای بی پی بەریتانی بۆ ئاڤا: لە کێڵگە نەوتییەکانی کەرکووک دەستبەکار دەبین

ئاڤا نیوز

بڕیارە لە سەرەتای مانگی داهاتووەوە ڕێککەوتنی کۆتایی لەنێوان کۆمپانیای BPـی بەریتانی و وەزارەتی نەوتی عێراق بۆ پەرەپێدانی کێڵگە نەوتییەکانی کەرکووک واژۆ بکرێت، دواتریش بە کرداری لەو پارێزگایەدا دەستبەکاردەبن.

چیرۆکی سەرەکی: 15-01-2025 لە چوارچێوەی سەردانەکەی سەرۆکوەزیرانی عێراق بۆ لەندەن، وەزارەتی نەوتی عێراق و کۆمپانیای بریتش پترۆڵیۆم (BP) یاداشتێکی لێکتێگەیشتنیان بۆ نۆژەنکردنەوە و پەرەپێدانی کێڵگە نەوتییەکانی کەرکووک واژۆکرد.

لێدوانی فەرمی: زەید یاسری، سەرۆکی لقی عێراقی کۆمپانیای بریتش پترۆڵیۆم BPى به‌ریتانی بە ئاڤا میدیای ڕاگەیاند: گفتوگۆکان لەگەڵ وەزارەتی نەوت بەگوێرەی لێکتێگەیشتنەکان بۆ گەیشتن بە ڕێککەوتنی کۆتایی بەردەوامن. 

 

ڕێککەوتنەکە بەمشێوەیە: لێکتێگەیشتنەکەش نۆژەنکردنەوە و زیادکردنی بەرهەمهێنانی نەوت لە کێڵگەکانی قوبەی بابا ‌و بای حەسەن و جمبور و ‌خەباز و وەبەرهێنان لە کەرتی غاز و گەڕان بەدوای بیرەنەوتی نوێش لەخۆدەگرێت. 

 

ئەوەی پێویستە بیزانیت: ڕۆژی 13ـی کانوونی دووەمی ئەمساڵ، دوای ڕاگەیاندنی ڕێککەوتنەکەی حکومەتی عێراق و کۆمپانیای (BP) حکومەتی هەرێمی کوردستان ڕاگەیێنراوێکی بڵاوکردەوە و ڕایگەیاند: حکومەتی عێراق لە 20 ساڵی ڕابردوودا ڕیفراندۆمی لە ناوچەکانی سنووری ماددەی 140دا نەکردووە و چارەنووسی یەکلانەکردوونەتەوە، ئێستاش لە هەوڵی ئەوەدایە گرێبەستی نەوت و گاز واژۆ بکات بەبێ ئەوەی ماددەکانی دەستوور بەگشتی و ماددەی 140 و 112 بەتایبەت لەبەرچاو بگرێت، ئەمەش پێشێلکردنی دەستوورە و قبوڵی ناکەن.