جەنگی ئابووریی دوو زلهێزەکەی جیهان پێدەنێتە قۆناغێکی نوێ

ئاڤا نیوز

نە شەڕی بازرگانی دۆناڵد ترەمپ لە ماوەی سەرۆکایەتی لە ساڵی 2017 بۆ 2021 و نە سنووردارکردنی بازرگانی چین لەلایەن جۆ بایدن، سەرۆکی پێشووی ئەمریکا نەیانتوانی ئامانجە تەکنەلۆژییەکانی چین لە جیهان ڕابگرن.

چیرۆکی سەرەکی: چین توانی لە ڕێگەی کۆمپانیای دیپسیکی ژیریی دەستکرد گەڕێکی دیکەی کێبڕکێ ئابوورییەکەی لە ئەمریکا بباتەوە. دیپسیکی چینی بازاڕی ژیریی دەستکردی بە چات جپیتی و کۆمپانیاکانی ئەمریکا چۆڵ کرد و بە بەهای 600 ملیار دۆلار زیانی بە بازاڕی کۆمپانیاکانی ئەو وڵاتە گەیاند.

دیپسیک چییە؟

ئەپێکی ژیریی دەستکردە و لەلایەن کۆمپانیای دیپسکی چینییەوە بەرهەمهێناوە، لە ئەمریکا و بەریتانیا دەبێتە یەکەمین ئەپی بێبەرامبەر و لە هەفتەی یەکەمییەوە زۆرترین جار لە بازاڕە ئەلیکترۆنییەکانی ئەو وڵاتانە داونڵۆد کراوە.

ئەپەکە لە هاوینی 2023ـەوە لە چین بەردەست بوو، بەڵام ئەم مانگە لە ئەمریکا خرایەڕوو و لەم چەند ڕۆژەشدا ناوبانگەکەی تەقییەوە. کۆمپانیاکە دەڵێت تەنیا 5 ملیۆن و 600 هەزار دۆلاری لە دروستکردنی ئەپەکە خەرج کردووە، کە ئەمەش پارەیەکی زۆر کەمە.

زانیاریی زیاتر: خاڵی سەرکەوتنی دیپسیک کەمی تێچووی داتاکانییەتی بەراورد بە ڕکابەرەکانی وەک ئۆپن ئەی ئای و ئنسرۆپیک و چەندانی تر، کە بەنزیکەی شەش ملیۆن دۆلار وەبەرهێنان لە مۆدێلەکەیدا کراوە بە شێوەیەکی بەرچاو کەمترە لەو ملیارەها دۆلارەی کە ڕکابەرەکانی خەرجیان کردووە. 

لێدوانی فەرمییەکان:

- دۆناڵد ترەمپ لەمبارەیەوە دەڵێت: ئەم هەنگاوەی چین بۆ ئەمریکا ئەرێنییە، ئەگەر تۆ بتوانیت بە هەرزانتر کاربکەی، بتوانیت بە کەمتریش هەمان ئەنجامت دەستبکەوێت، پێم وایە ئەمە شتێکی باشە بۆ ئێمە.

- سام ئاڵتمان، بەڕێوەبەری جێبەجێکاری کۆمپانیای Open AIی ئەمریکی کە خاوەنی چات جی پی تییە و تەنیا ساڵی ڕابردوو  5 ملیار دۆلاری خەرج کردووە، وەسفی دیپسیک دەکات و دەڵێت: خزمەتگوزاری کۆمپانیاکە سەرنجڕاکێشە، هەبوونی رکابەرێکی نوێش بە جۆشە، بەڵام پێموایە هێزی گەورەی تەکنەلۆژیای ژیریی دەستکردی ئێمە کلیلی سەرکەوتنی کۆمپانیاکەمانە و نیگەرانی پێشکەوتنی دیپسیک نیین، ئەمریکا وەک لایەنێکی باڵادەست لە گۆڕەپانەکەدا دەمێنێتەوە.

لە لایەکی دیکەوە: ئەم جووڵەیەی چین لە کاتێکدایە، هەفتەی ڕابردوو دۆناڵد ترەمپ سەرۆکی ئەمریکا بڕیاری دا بە بڕی 500 ملیار دۆلار وەبەرهێنان لە کەرتی تایبەتدا بکات بۆ پەرەپێدان بە ژیریی دەستکرد لە وڵاتەکەیدا، ئامانج لەم بڕیارەشی بۆ ئەوە بوو ئەمریکا لە کێبڕکێی وڵاتانی ڕکابەری ژیریی دەستکرد زیاتر پێشبکەوێت.