ڕێباز حەملان: لە كۆبوونەوەكەی ئەمڕۆ تەنیا باسی دوو بابەت كرا

ئاڤا نیوز

ڕێباز حەملان، بریكاری وەزارەتی دارایی عێراق ناوەڕۆكی كۆبوونەوەی ئەمڕۆی نێوان شاندی هەرێمی كوردستان و عێراق ئاشكرا دەكات.

 

 

چیرۆكی سەرەكی: دوێنێ پێنجشەممە 2025-1-30 شاندێكی هەرێمی كوردستان بۆ یەكلاكردنەوەی پرسی مووچەی فەرمانبەرانی هەرێمی كوردستان و مووچە و پاداشتی خانەنشینان و چەند پرسێكی دیكە و كۆبوونەوەیان لەگەڵ بەرپرسانی باڵای عێراق گەیشتنە شاری بەغدا و نیوەڕۆی ئەمڕۆ بۆ ماوەی دوو كاتژمێر لە هۆتێل بەغدا لە شاری بەغدا كۆبوونەوە.

 

 

لێدوانی فەرمی: ڕێباز حەملان، بریکاری وەزارەتی دارایی عێراق لە كۆنفڕانسێكی ڕۆژنامەوانیدا ڕایگەیاند:

- كۆبوونەوەكەی ئەمڕۆ ئەرێنی بوو و تەنیا باس لە دوو بابەت كرا ئەوانیش بریتی بوون لە مووچەی مانگی یەكی فەرمانبەرانی هەرێمی كوردستان و مووچە و پاداشتی خانەنشینان، جگە لەو دوو بابەتە باسی هیچ بابەتێكی دیكە نەكرا، مووچەی مانگی یەك دەكرێت بە بنەما بۆ تەواوی مانگەكانی ئەمساڵ

- لە كۆبوونەوەكەدا هەندێك وردەكاری و تێبینی سەبارەت بە لیستی خانەنشینان هەبوو، حكومەتی عێراق خانەنشینیی فەرمانبەرانی هەرێمی كوردستان لە 1-1ی ئەمساڵەوە جێبەجێ دەكات بەڵام ئەوەی 1-7ی ساڵی ڕابردوو هەرێمی كوردستان كردوویەتی لەسەر داهاتی خۆی داویەتی و بەمشێوەیەش بەردەوام دەبێت، بە هۆی ئەو وردەكارییەوە بەشی دووەمی كۆبوونەوەكەی سبەی تەواو دەكرێـت.

- كاتژمێر (8:00)ی سبەی شەممە، لەنێو وەزارەتی دارایی عێراق كۆبوونەوەیەكی دیكە لەنێوان شاندی هەرێمی كوردستان و عێراق بەڕێوەدەچێت و تەواوكاری كۆبوونەوەكەی ئەمڕۆ دەبێت.