پێشانگای نێودەوڵەتیی بەغدا دەکرێتەوە

ئاڤا نیوز

لە ژێر دروشمی "وەبەرهێنان - گەشەپێدان – خۆشگوزەرانی" و بە بەشداری 20 وڵاتی عەرەبی و نێودەوڵەتی و زیاتر لە هەزار کۆمپانیای ناوخۆیی و نێودەوڵەتی، 48ــەمین خولی پێشانگای نێودەوڵەتیی بەغدا دەکرێتەوە.

 

چیرۆکی سەرەکی: ئەمڕۆ شەممە 1-2-2025، لەژێر چاودێری محەممەد شیاع سوودانی، سەرۆکوەزیرانی عێراق، 48ــەمین خولی پێشانگای نێودەوڵەتیی بەغدا دەست بە کارەکانی دەکات.

 

بۆچی گرنگە: لە میانی بەڕێوەچوونی ئەم پێشانگایانە کە چەندین کۆمپانیای ناوخۆیی و نێودەوڵەتیی تێیدا بەشدار دەبن، لەو ڕێگەیەوە بەرهەمەکانیان بە میوانان و بەشدارانی پێشانگاکە دەناسێنن و ساغی دەکەنەوە.

 

لێدوانی فەرمی: ئەسیر داود غەریری، وەزیری بازرگانیی عێراق بە ئاژانسی فەرمی وڵاتەکەی ڕاگەیاند: چالاکییەکان ئەمڕۆ شەممە 1ـی شوبات دەست پێدەکات و تا 7ـی مانگ بەردەوام دەبێت، سەرجەم ئامادەکارییەکانیش تەواو کراون.

 

زانیاریی زیاتر: بە گوتەی غەریری، "پێشانگای نێودەوڵەتی بەغدا نوێنەرایەتی خاڵێکی سەرنجڕاکێش دەکات بۆ وەبەرهێنەرانی بیانی"، ئاماژەی بەوەشکرد، "وەشانی ئەمساڵ جیاواز دەبێت لە ساڵی ڕابردوو لەڕووی هەمەجۆریی ڕووداوە ئابووری و کولتووری و هونەرییەکانەوە".

 

ئەوەی پێویستە بیزانیت: پێشانگای نێودەوڵەتی بەغدا ڕوواوێکی ساڵانەیە تێیدا کۆمپانیا ناوخۆی و نێودەوڵەتییەکان کۆدەبنەوە بۆ پێشکەشکردنی بەرهەم و خزمەتگوزارییەکانیان و فراوانکردنی بنکەی مامەڵە بازرگانییەکانیان.