لە عێراق وەرگرتنی چارەسەری دەروونی دەبێتە یاسا

ئاڤا نیوز

ڕۆژی سێشەممە 4-2-2025، پەرلەمانی عێراق دەنگ لەسەر پڕۆژە یاسایەک دەدات كە تایبەتە بە چارەسەریی دەروونی.

 

وێنە گەورەكە: ئەنجوومەنی نوێنەرانی عێراق، كارنامەی ڕۆژی 4-2-2025ـی بڵاوكردەوە و بەگوێرەی بڕگەیەكی كارنامەكەش، دەنگ لەسەر پڕۆژە یاسای چارەسەری دەروونی دەدرێت كە لەلایەن لیژنەی تەندروستی و ژینگە لە پەرلەمانی عێراق ئامادە كراوە.

 

لێدوانی فەرمی: دكتۆر ماجد شنگالی، سەرۆكی لیژنەی تەندروستی و ژینگە لە پەرلەمانی عێراق ڕایگەیاند، دوای چەندین كۆبوونەوەی ڕاوێژكاری لەگەڵ پسپۆڕانی بواری دەروونی لە وەزارەتی تەندروستیی عێراق و مامۆستایانی زانكۆ لە بواری پەروەردەی دەروونی و پسپۆڕانی ئاشتەوایی كۆمەڵایەتی، پڕۆژە یاسایێكمان ئامادەكردووە بۆ ئەوەی بواری چارەسەریی دەروونی بە یاسا ڕێكبخرێت و ڕۆژی سێشەممە 4ـی شوبات، لە دانیشتنی ئاسایی پەرلەمان دەنگ لەسەر یاساكە دەدرێت.

 

بۆچی گرنگە: بەگوێرەی توێژینەوەكان توندوتیژی بەسەرجەم جۆرەكانییەوە لە عێراق، لە حاڵەتەوە بۆتە دیاردە و هەزاران كەیسی پەیوەست بە توندوتیژی خێزانی لە دادگاكان تۆماركراون، بەشێكی زۆر لەو كەیسانەش پەیوەندی بە تێكچوونی دۆخی دەروونی تاكەكان هەیە.

 

زانیاریی زیاتر: دەرچوونی یاسای چارەسەری دەروونی، وەزارەتی تەندروستیی فیدڕاڵی پابەند دەكات بە زیادكردنی سەنتەرەكانی تایبەت بە چارەسەری دەروونی كە ئێستا لە عێراق زۆر كەم و سنووردارە، هاوكات وەزارەتی خوێندنی باڵا و توێژینەوەی زانستی پابەند دەكات بە كردنەوەی بەشی چارەسەریی دەروونی لە كۆلێژە پزیشكییەكان لەپێناو ڕەخساندنی دەرفەتی خوێندن لەم بوارە بۆ خوازیاریی چارەسەری دەروونی.