سوپای پاسداران كۆڵبەرێكی لە ڕۆژهەڵاتی كوردستان كوشت

ئاڤا نیوز

کۆڵبەرێک لە ڕۆژهەڵاتی کوردستان لەسەر سنووری بانە بەتەقەی ڕاستەوخۆی سوپای پاسدارانی ئێران کوژرا.

چیرۆکی سەرەکی: ڕۆژی یەکشەممە 03-03-2024، عەلی زەرغامی، کۆڵبەرێکی خەڵکی شاری تیکاب ـی سنووری شاری سەقز، لە کاتی کۆڵبەری و لە سنووری هەنگەژاڵی بانە، لەلایەن سوپای پاسدارانەوە تەقەی لێکراوە و گیانی لەدەستداوە.

ڕاگەیێنراوی فەرمی: ڕێکخراوی مافی مرۆڤی هەنگاو لە ڕاگەیێنراویکدا ڕایگەیاند: کاتژمێر دووی سەر لەبەیانیی ئەمڕۆ یەکشەممە،  03-03-2024 ، سوپای پاسداران تەقەیان لە کۆمەڵێک کۆڵبەر کردووە و بەو هۆیەشەوە کۆڵبەرێک بە ناوی عەلی زەرغامی تەمەن 52 ساڵ پێککراوە و دەستبەجێ گیانی لەدەستداوە.

 
ئەوەی پێویستە بیزانیت: بە گوێرەی ناوەندی ئامار و بەڵگەنامەکانی ڕێکخراوی هەنگاو، لە مانگی دووی ئەمساڵ بەلایەنی کەمەوە چوار کۆڵبەر گیانیان لەدەستداوە و 63ـی دیکەش برینداربوون.