سەرۆكی ئەركانی وەزارەتی پێشمەرگە: توانای سەربازیی هێزی پێشمەرگەمان پەرەپێداوە

ئاڤا نیوز

 

سەرۆکی ئەرکانی وەزارەتی پێشمەرگەی هەرێمی کوردستان ڕایدەگەیێنێ، توانای سەربازیی هێزەکانی پێشمەرگەیان پەرپێداوە و لە کەمووکورتی میحوەرەکانیان کۆڵیوەتەوە.

 

چیرۆكی سەرەكی: ڕۆژی 1-2-2025، سەرۆكی ئەركانی وەزارەتی پێشمەرگە و شاندی یاوەری، بەمەبەستی لەنزیكەوە ئاگاداربوون لە دۆخی سەنگەرەكانی بەرگریی هێزی پێشمەرگە، سەردانی چیای قەرەچووغی كرد و لەلایەن فەرماندەی لیوای (14)ـی پیادە، سەر بە فیرقەی یەكی وەزارەتی پێشمەرگە پێشوازیی لێ كرا.

 

ڕاگەیێنراوی فەرمی: لەو سەردانەدا، فەریق ڕوكن، عیسا عوزێر، سەرۆكی ئەركانی وەزارەتی پێشمەرگە ڕایگەیاند، "كاری جددیان بۆ پەرەپێدانی توانای سەربازیی هێزی پێشمەرگە كردووە، لە پێداویستی و كەموكوڕییەكانی میحوەرەكانیان كۆڵیوەتەوە، دڵنیابووینەوە لەوەی سەنگەرەكانی بەرگریی پێشمەرگە تۆكمەیە".

 

بەتەنیشت ئەمەوە: لەکاتی سەردانەکەی سەرۆکی ئەرکانی وەزارەتی پێشمەرگە، فەرماندەی لیوای (14)ـی پیادە پوختەیەکی لەبارەی جوگرافیای دەڤەری مەخموور و سنووری ئەرکی هێزەکانی پێشمەرگەی لە چیای قەرەچووغ باس كرد و ئامادەیی هێزی پێشمەرگەشی لە سنووری ئەرکی لیواكه‌ دەربڕی، بۆ ڕووبەڕووبونەوەی هەر ئەگەرێکی نەخوازراو.

ئەوەی پێویستە بیزانیت: بەهۆی دروستبوونی بۆشایی ئەمنی لە ناوچە كوردستانییەكانی دەرەوەی ئیدارەی هەرێمی كوردستان، شانە نووستووەكانی داعش جار جار جموجۆڵی دەکەن و ترس و دڵەڕاوكێ بۆ هاووڵاتیانی ئەو سنوورە دروست دەكەن، بەهێزكردنی میحوەرەكان و هەماهەنگی نێوان پێشمەرگە و هێزە عێراقییەكان بۆ پاراستنی ئەمنیەتی ناوچەكە پێویستە.