ئاڤا دوایین زانیاریی لە بارەی مووچەی مانگی یەک بڵاو دەکاتەوە

ئاڤا نیوز

بڕیار بوو ئەمڕۆ تەیف سامی مووچەی مانگی یەک خەرج بکات، بەڵام خەرجی نەکرد، ئاڤا زانیویەتی هەندێک رێکاری ماوە، بەتایبەت مووچەی پێشمەرگە و مووچەخۆرانی سەربازی، پێویستی بە ڕەزامەندی سوودانییە.

وێنە گەورەکە: ماوەی چوار ڕۆژە شاندێکی باڵای حکومەتی هەرێمی کوردستان بۆ یەکلاییکردنەوەی مووچەی مانگی یەک و پرسی بودجە لە بەغدان لەگەڵ هاوتاکانیان زنجیرەیەک کۆبوونەوەیان کردووە، سبەیش کۆبووەنەوە بەردەوام دەبێت تاوەکو لەسەر ئەم بابەتانە و داواکارییەکانی بەغدا بگەنە ئەنجامی کۆتایی.

زانیاریی پەیامنێر: بڕیارە سبەی کۆبوونەوەیەکی دیکە لەنێوان شاندی کوردستان و وەزارەتی دارایی عێراق بکرێت، ئەگەر ڕێکبکەون و پرسی مووچەی پێشمەرگەش چارەسەر بکرێت، بڕیار لەبارەی ناردنی مووچەی مانگی یەک دەدرێت و لیستی مووچە بڵاودەکرێتەوە.

لە لایەکی دیکەوە: ئێوارەی ئەمڕۆ پێشەوا هەورامانی، گوتەبێژی حکومەتی هەرێمی کوردستان سەبارەت بە گفتوگۆی نێوان شاندی کوردستان و وەزارەتی دارایی عێراق  ڕوونکردنەوەی دا و وتی: لە دوو ڕۆژی ئایندە وەزارەتی دارایی عێراق دەست بە ناردنی پارە بۆ مووچەی فەرمانبەرانی هەرێمی کوردستان دەکات، بە پارەکەش موچەی مانگی یەک دابەش دەکرێت.

زانیاریی بەدەستهاتوو: سەرچاوەیەک لە وەزارەتی دارایی و ئابووریی هەرێمی كوردستان بە ئاڤای ڕاگەیاند، بەغدا 950 ملیار دینار بۆ مووچەی مانگی یەک خەرج دەكات، پارەكەش بە دوو گوژمە دەنێردرێت، دوای ئەوەی تەیف سامی بڕیاری تەمویلکردنی دەرکرد، نووسراو ئاڕاستەی بانکی ناوەندیی عێراق دەکرێت بۆ ئەوەی پارە بخاتە سەر هەژماری  هەرێمی کوردستان لە لقی هەولێری بانکی ناوەندی.

زانیاریی زیاتر: لیستی مووچەی مانگی یەك دەكرێتە بنەما بۆ هەموو مانگەكانی ئەمساڵ، بڕی ئەو پارەیەی بۆ ئەم مانگەش ڕەوانە دەكرێت، نزیکەی بەشی تەواوی مووچەخۆران دەكات بەبێ خانەنیشنكراوانی نوێ.

دەربارەی مووچەی خانەنشینکراوانیش سەرچاوەکەی وەزارەتی دارایی ڕایگەیاند، ئەو فەرمانبەرانەی تەمەنیان گەیشتووەتە تەمەنی خانەنشینی، واتە تەمەنەکانی 60 تاوەکو 63 ساڵ ناویان لە لیستی مووچە دەرهێنراوە، ئەو فەرمانبەرانە تاوەکو مامەڵەی خانەنشینبوونیان تەواودەکەن مووچە وەرناگرن، بەڵام هەر کاتێک مامەڵەکەیان تەواو بوو لە مانگی یەکی ئەمساڵەوە بۆیان ئەژماردەکرێت و هەموو مووچەکانیان پێکەوە وەردەگرن.