پەیامێک لە مەسرور بارزانییەوە لەبارەی هەمواری یاسای بودجە

ئاڤا نیوز

سەرۆکوەزیران مەسرور بارزانی، پەیامێک دەربارەی هەمواری یاسای بودجەو دەستپێکردنەوەی هەناردەی نەوتی کوردستان و دیاریکردنی خەرجی بەرهەمهێنان و گواستنەوەی نەوت بڵاودەکاتەوە و دەڵێت، "هیوادارین ئەم هەنگاوە ببێتە سەرەتایەک بۆ چارەسەرکردنی هەموو کێشەکانی دیکە."

چیرۆکی سەرەکی: ئەمڕۆ یەکشەممە ئەنجوومەنی نوێنەرانی عێراق دەنگی لەسەر هەمواری یاسای بودجە دا کە بڕگەیەکی تایبەت بوو بە پرسی هەناردەکردنەوەی نەوتی کوردستان، بەمەش هیچ گرفتێک لەبەردەم دەستپێکردنەوەی نەوت نامێنێت

پەیامی فەرمی: سەرۆکوەزیران مەسرور بارزانی لە پەیامێکیدا دەڵێت:-

- پێشوازی لە دەنگدانی ئەمڕۆی ئەنجوومەنی نوێنەران لە سەر هەمواری یاسای بودجەی فیدراڵ دەکەین.

- دەستخۆشی لە هەموو ئەوانە دەکەین هاوکاربوون لە سەرخستنی هەموارکردنەکە. هەروەها سوپاسی تیمی دانوستانکاری حکومەتی هەرێمیش دەکەین بۆ کارکردن لەپێناو دانانی میکانیزمی چارەسەرکردنی کێشەی مووچە.

- هیوادارین ئەم هەنگاوە ئەرێنییەی هەموارکردنی یاسای بودجە، ببێتە سەرەتایەک بۆ چارەسەرکردنی هەموو کێشەکانی دیکە و پابەندبوونی حکومەتی فیدراڵ بە ناردنی مووچە و شایستە داراییەکانی هەرێمی کوردستان.