خانەنشینکردنی پارێزگاری بەغدا ناکۆکی سیاسی لێدەکەوێتەوە

ئاڤا نیوز

 

سەرۆکی ئەنجوومەنی پارێزگای بەغدا نوسراوێکی کارگێڕی دەرکردووە و پارێزگاری پایتەختی ڕەوانەی خانەنشینی کردووە، ئەمەش ناکۆکی سیاسیی لێکەوتووەتەوە و بەشێک لە فراکسیۆنەکانی ناو ئەنجوومەنەکە دەڵێن، نوسراوەکە نایاساییە و لێپرسینەوە لەسەر سەرۆکی ئەنجوومەن دەکەن. 

 

چیرۆکی سەرەکی: عەممار قەیسی، سەرۆکی ئەنجوومەنی پارێزگای بەغدا (سەر بە پشکی هاوپەیمانی عەزم) دوێنێ پاڵپشت بە یاسای خانەنشینی یەکگرتوو و بڕیارەکانی ئەنجوومەنی دەوڵەت، عەبدولموتەڵب علوی پارێزگاری بەغدا (لەسەر پشکی دەوڵەتی یاسا)ی ڕەوانەی خانەنشینی کرد.

 

ڕاگەیێنراوی فەرمی: هاوپەیمانی بڕیار و ئاوەدانکردنەوە کە بەم دواییە لەنێوان فراکسیۆنەکانی (تەقەدوم، دەوڵەتی یاسا، ئەساس، بابلیۆن و ئبشیر یا عێراق) لە ئەنجوومەنی پارێزگای بەغدا پێکهێنراوە، نوسراوەکەی سەرۆکی ئەنجوومەن بە نایاسایی ناودەبات و وەک هەوڵێکی نەرێنی بۆ تێکدانی ئارامی بەغدای لە قەڵەم دەدات. هاوپەیمانێتییەکە دەشڵێت، نوسراوەکە هاوکاتە لەگەڵ دیاریکردنی ڕۆژی سێشەممەی ئەم هەفتەیە بۆ لێپرسینەوە لە سەرۆکی ئەنجوومەن.

 

ئەمەش بزانە: ماوەیەکە سوننەکان شەڕێکی یاساییان لەدژی یەکتر دەستپێکردووە، لەو چوارچێوەیەشدا ئەیلولی ڕابردوو، سەرۆکی ئەنجوومەنی پارێزگای بەغدا لە پشکی هاوپەیمانی عەزم بەهۆی ئامادەنەبوون لە شەش دانیشتندا، کۆتایی بە ئەندامییەتی ئەندامێکی ئەنجوومەنەکە لە حیزبی تەقەدوومی محەممەد حەلبوسی هێنا.