سەڵتەنەی عومان كونسوڵخانەی خۆی لە هەرێمی كوردستان دەكاتەوە

ئاڤانیوز

سەرۆكوەزیران، مەسرور بارزانی، خواستی هەرێمی كوردستان بۆ پتەوكردنی پەیوەندییەكان لەگەڵ سەڵتەنەی عومان دووپات دەكاتەوە. لە ئاییندەیەكی نزیكیشدا سەڵتەنەی عومان كونسوڵخانەی خۆی لە هەرێمی كوردستان دەكاتەوە.

وێنە گەورەكە: ئەمڕۆ دووشەممە، سەرۆكوەزیران مەسرور بارزانی، سەرۆكی حكومەتی هەرێمی كوردستنان، پێشوازی لە شاندێكی سەڵتەنەی عومان كرد بە سەرۆكایەتی قەیس بن محەممەد ئەلیوسف، وەزیری بازرگانی و پیشەسازی و برەودان بە وەبەرهێنانی ئەو وڵاتە.

ڕاگەیێنراوی فەرمی: ماڵپەڕی فەرمیی حكومەتی هەرێمی كوردستان بڵاویكردووەتەوە، سەرۆكوەزیران لەم دیدارەدا جەختی لە پێویستیی بەهێزكردنی پەیوەندییەکانی هەرێمی کوردستان و سەڵتەنەی عومان كردەوە لە بوارە جۆراجۆرەکاندا، بە تایبەتی بازرگانی، پیشەسازی و وەبەرهێنان.

بەتەنیشت ئەمەوە: وەزیری بازرگانی و پیشەسازی و برەودان بە وەبەرهێنانی سەڵتەنەی عومان، خۆشحاڵی خۆی بە سەردانیان بۆ هەرێمی کوردستان نیشاندا و ئامادەیی وڵاتەکەیان بۆ پەرەپێدانی پەیوەندیی دوولایەنە دەربڕی.

بۆچی گرنگە: سەڵتەنەی عومان بە گرنگی دەزانێت، لە ئاییندەیەكی نزیكدا کونسوڵخانەی گشتیی خۆی لە هەرێمی کوردستان بكاتەوە.