پەرلەمانتارەكەی ڕەیان كلدانی لە سلێمانی وەک مامۆستایەک بەشداریی لە خۆپێشاندان دەكات

ئاڤا نیوز  

 

ئەمڕۆ لە شاری سلێمانیی ژمارەیەک لە مامۆستایان و فەرمانبەران بۆ داواكردنی مووچە و پاڵپشتی لە مامۆستا مانگرتووەكان خۆپێشانێکیان ئەنجامدا، بەڵام بەشداریكردنی پەرلەمانتارەكەی ڕەیان كلدانی ناڕەزایی بەشێک لە خۆپێشاندەری لێكەوتەوە.

زانیاریی بەدەستهاتوو: بەپێی ئەو زانیارییانەی دەست ئاڤا میدیا كەوتوون، لە خۆپێشاندانەكەی ئەمڕۆی سلێمانی، دانا ئامانج، پەرلەمانتاری بابیلۆن (حیزبەكەی ڕەیان كلدانی) وەک مامۆستایەک بەشداریی كردووە، پاڵپشتیی خۆی و حیزبەكەی بۆ خۆپێشاندەران دووپات كردووەتەوە.

لەلایەكی دیكەوە: بڵاوبوونەوەی وێنەی پەرلەمانتارەكەی ڕەیان كلدانی، ناڕەزایی بەشێك لە خۆپێشاندەرانی لێكەوتووەتەوە و هاوكات لە تۆڕە كۆمەڵایەتییەكانیش كەسانێك بە توندی ڕەخنەیان لە بەشداریكردنی دانا ئامانج گرتووە.

ئەوەی پێویستە بیزانیت: ڕەیان كلدانی، ئەمینداری گشتیی بزوتنەوەی بابلیون بە هەڵوێستەكانی لە دژی پێشمەرگە و كورد و كوردستان ناسراوە، هاوكات بەهۆی پێشێلکردنی مافەکانی مرۆڤ و  تێوەگلان  لە گەندەڵی لە ساڵی 2019 ــەوە لە لیستی سزادراوانی ئەمریکایە،هەروەها دانا ئامانج كە پەرلەمانتاری بزووتنەوەكەیە پێشووتر لە لاپەڕەی خۆی لە فەیسبووك، هەرێمی كوردستانی بە "شیمالی عێراق" ناو بردبوو، كە ئەمەش لە كاتی خۆیدا ناڕەزایی توندی خەڵكی كوردستانی لێكەوتەوە.

باكگراوند: دانا ئامانج، كاندیدی بزووتنەوەی بابلیون بوو لە كورسی كۆتای مەسیحییەكان لە بازنەی سلێمانی، بە پشتیوانیی یەكێتیی نیشتمانیی كوردستان توانی دەنگی پێویست بەدەستبهێنێت و ئێستا ئەندامی خولی شەشەمی پەرلەمانی كوردستانە.