مووچەی مانگی یەک چۆن دابەش دەکرێت؟

ئاڤا نیوز

لە چەند کاتژمێری داهاتوودا لیستی مووچەی مانگی یەک ڕادەگەیێنرێت و سبەی چوارشەممە دەست بە دابەشکردنی دەکرێت. هەر پەیوەست بە مووچە، سبەی ئەنجوومەنی وەزیرانی هەرێمی کوردستان کۆدەبێتەوە.


وێنە گەورەکە: ئەمڕۆ سێشەممە وەزارەتی دارایی عێراق بڕی 958 ملیار و 12 ملیۆن دیناری بە یەک گوژمە بۆ مووچەی مانگی یەکی هەرێمی کوردستان نارد کە ئەوە یەکەم جارە بەغدا پارەی مووچەی مووچەخۆرانی هەرێمی کوردستان بە یەک گوژمە و بێ کێشەبنێرێت. هاوکات بەپێی ڕێککەوتنی شاندی باڵای هەرێمی کوردستان و وەزارەتی دارایی عێراق، پێویستە بەغدا هەموو مانگێک بەبێ کێشە پارەی مووچە بینێرێت. 

زانیاریی تایبەت: بەپێی زانیارییەکانی ئاڤا میدیا، مووچە بەپێی سیستەمی پەیرۆل دابەش دەکرێت کە سیستەمێکی ئەلیکترۆنی و نوێیە و یەکەم مانگە جێبەجێ دەکرێت، بەپێی ئەم سیستەمە هەر وەزارەت و دەستە و سەرۆکایەتییەک زووتر لیستی مووچەی فەرمانبەرانی ئامادەکردبێت و ناردبێت، مووچەی فەرمانبەرانی ئەوان سەرەتا دابەش دەکرێت.

ئەوەی پێویستە بیزانیت: بەپێی سیستەمی نوێی مووچە، وەزارەتی دارایی ناتوانێ لە دوو ڕۆژدا مووچە دابەش بکات وەک بڵاوکراوەتەوە، ئاڤا زانیویەتی ئەمشەو لیستی مووچە ڕادەگەیێنرێ و لە بەیانییەوە دەست بە دابەشکردنی دەکرێت، ڕەنگە تا ڕۆژانی شەممە و یەکشەممە بەردەوام بێت.

ئەمەش بزانە: بەپێی زانیارییەکانی ئاڤا میدیا سبەی خانەنشینانی مەدەنی و سەربازی مووچە وەردەگرن، لەدوای ئەوانیش کەسوکاری شەهیدان و ئەنفالکراوان، خاوەن پێداویستی تایبەت و زیندانیانی سیاسی مووچەکانیان وەردەگرن.

زانیاریی زیاتر: وەزارەتی دارایی لەگفتوگۆدایە، پێشنیاز هەیە وەزارەتی پەروەردە پێش بخرێت، بەڵام بەپێی سیستەمە تازەکە ناکرێت.

باکگراوند: ئەمڕۆ لە ڕاگەیێنراوێکدا وەزارەتی دارایی و ئابووریی هەرێمی کوردستان ڕایگەیاند:

- دوای تەواوبونی ڕێکارەکانی گواستنەوەی پارە بۆ بانکەکان، سبەی چوار شەممە دەست بە دابەشکردنی مووچەی مانگی یەک دەکرێت و لە چەند ڕۆژێکدا مووچەی سەرجەم مووچەخۆران دابەش دەکرێت.

- لە چەند کاتژمێری داهاتوودا خشتەی مووچەی سەرجەم وەزارەت و دەستە و دامەزراوەکانی هەرێمی کوردستان ڕادەگەیێنرێت.