هیوا ئەفەندی بۆ ئاڤا باسی وردەکاریی سیستەمی ئەلیکترۆنی مووچە دەکات

ئاڤا نیوز

داتای 700 هەزار فەرمانبەر لە هەرێمی کوردستان بە دیجیتاڵی کراوە تاوەکو مانگی سێ خانەشینان و مووچەخۆرانی سەربازیش لەنێو پرۆسەکە تۆمار دەکرێن.

وێنە گەورەکە: بەمەبەستی فراوانکردن و بەهێزکردنی ژێرخانی کەرتی گشتی و زیادکردنی کارامەیی حکومەت، سیستەمێکی نوێی دیجیتاڵی تایبەت بە بەڕێوەبردنی مووچە لەسەر بنەمای پێناسی دیجیتاڵی دەخاتە خزمەت.

لێدوانی فەرمی: د.هیوا ئەفەندی، سەرۆکی فەرمانگەی تەکنەلۆژیای زانیاری لە نان و چای ئاڤا گوتی، "سیستمە دیجیتاڵییەکە بە شێوازێک داڕێژراوە کە حکومەت هەر بڕیارێک لەبارەی فەرمانبەرەکە بدات دەتوانرێت لەسەر لیستەکە دەستکاری بکرێت و پرۆسەکە بەتەواوەتی ئەلیکترۆنییە و تەنیا کە دەگاتە ئەوەی ڕادەستی بەغدا بکرێت دەبێت بە کاغەز، چونکە بەغدا بە کاغەز کار دەکات.

زانیاریی زیاتر: نزیکەی هەزار و 180 یەکەی ژمێریاری هەیە واتە هەموو مانگێک شەش هەزار کەس لەچوارچێوەی ئەو یەکە ژمێریاریانە سەرقاڵی ئامادەکردنی لیستی مانگانەی مووچەن.

خاڵە ئەرێنییەکان: ئامانجی ئەم سیستەمە ڕێکخستنەوەی پرۆسەی ئامادەکردنی خشتەکانی مووچەیە بەشێوەیەکی سەرانسەریی لە کەرتی گشتیدا لەڕووی کارایی و وردی و ڕوونییەوە، ئەمەش دەبێتە هۆی بەهێزکردنی تەواوی پرۆسەی بەڕێوەبردنی مووچە لە سەرجەم دامودەزگاکانی حکومەت.

ئەوەی پێویستە بیزانیت: سیستمی دیجیتاڵی دارایی، لەسەر فەرمانی سەرۆکوەزیران بارزانی دروستکراوە، ئەم سیستمە بە یەک کلیک لیستی مووچە بە سەرجەم زانیارییەکانیەوە دەگەیێنێتە بەردەستی خەزێنەی وەزارەتی دارایی عێراق.