دوو گوندی بەردەڕەش موەلیدە هەڵدەگرن و كارەبا لە وزەی خۆر وەردەگرن

ئاڤا نیوز

لە دوو گوندی قەزای بەردەڕەش، سەرجەم ماڵەكان كە ژمارەیان 160 ماڵ دەبێت، كارەبا لە وزەی خۆر وەردەگرن و موەلیدەی ئەهلی بەیەكجاری هەڵدەگیرێت.

چیرۆكی سەرەكی: دانیشتووانی هەردوو گوندی شێخالك و ترپەسپی لە شارۆچكەی بەردەڕەش، سەرجەم ماڵەكان كارەبا لە وزەی خۆر وەردەگرن و كاركردنی مۆلیدەی ئەهلی لەو دوو گوندە نامێنێت.

لێدوانی فەرمی: ئەندازیار ئەرشەد محەممەد، بەڕێوەبەری كارەبای بەردەڕەش، لە پێگەی فەرمی قەزای بەردەڕەش لە تۆڕە كۆمەڵایەتییەكان ڕایگەیاندووە، سیستمی وه‌رگرتنی كاره‌با له‌ وزه‌ی خۆر له‌ هه‌ردوو گوندی شێخالك و ترپه‌سپی سه‌ركه‌وتوو بووه‌ و ئێستا‌ گەره‌نتی ھه‌یه‌ تا 25 ساڵ كاره‌با به‌رهه‌م بهێنێت، پاترییه‌كانیش پێنج بۆ حه‌وت ساڵ گەره‌نتی كراون.

بۆچی گرنگە: پڕۆژەی بەرهەمهێنانی كارەبا لە وزەی خۆر دۆستی ژینگەن، دەبنه‌ هۆی باشترکردنی سێکتەری کارەبا و کارئاسانی بۆ هاوبەشان و هاووڵاتیان دەكات بۆ سوودمەندبوون لە کارەبای بەردەوام.

ئەوەی پێویستە بیزانیت: سەرجەم ماڵەكانی ئەو دوو گوندە جگە لەو كارەبایەی لە وزەی خۆر دەستیان دەكەوێت، پێوەری زیرەكیان هەیە و هەر خێزانێك 30 ئەمپێر كارەبای نیشتمانی پێ دەدرێت، بەپێی بڕیارێكی وەزارەتی كارەبا، هەر هاوبەشێكی كارەبا سیستمی وزەی خۆر دابنێت و تۆماری بكات، ئەو بڕە كارەبایەی دەگەڕێتەوە بۆ ناو تۆڕی كارەبای نیشیمانی مانگانە بە شێوەی (مەقاسە - لێ داشكاندن) لە خەرجیی كارەبا نیشتمانییەکەی دەردەكرێت.