ئەم هەفتەیە شاندی باڵای پارتی و یەکێتی لەسەر ڕەشنووسی پێکهێنانی کابینەی دەیەم کۆدەبنەوە

ئاڤا نیوز

 

بڕیارە لەم هەفتەیە کۆبونەوەی شاندی باڵای پارتی دیموکراتی کوردستان و یەکێتیی نیشتمانیی کوردستان بکرێت بۆ قسەکردن لەسەر ئەو ڕەشنووسەی لە کۆبوونەوەی تیمی تەکنیکی هەردوولا لەسەری ڕێککەوتوون.

 

زانیاریی پەیامنێر: ژیوار عەبدولرەحمان، پەیامنێری ئاڤا میدیا لە سلێمانی ڕایگەیاند: ئەم هەفتەیە شاندی باڵای پارتی و یەکێتی لەسەر ڕەشنووسی کۆتایی پێکهێنانی کابینەی دەیەمی حکومەتی هەرێمی کوردستان کۆدەبنەوە. هاوکات لە کۆبوونەوەی مەکتەبی سیاسی یەکێتی  کە بڕیارە ئەمڕۆ شەممە بەڕێوەبچێت، سێ تەوەر باس دەکرێن، ئەوانیش سەردانی بافڵ تاڵەبانی بۆ ئەمریکا، ڕەشنووسی تیمی تەکنیکی پارتی و یەکێتی و ڕێککەوتنی نێوان هەرێمی کوردستان و بەغدا. 

 

لەلایەکی دیکەوە: سەعدی ئەحمەد پیرە، وتەبێژی یەکێتیی نیشتمانیی کوردستان ڕایگەیاندووە، کۆبوونەوەی مەکتەبی سیاسی یەکێتی لە سلێمانی دەبێت، کۆبوونەوەکە بۆ گفتوگۆکردنە لەبارەی ئەو ڕەشنووسەی ئامادەکراوە لەلایەن تیمی تەکنیکی هەردوو حزب، پێویستە لەلایەن مەکتەبی سیاسی هەردوولا گفتوگۆی لەبارەوە بکرێت، تاوەکو لە قۆناغی داهاتوو بخرێتە بەردەست شاندی باڵای پارتی و یەکێتی و ڕێککەوتنی لەسەر پێکهێنانی کابینەی دەیەمی لێبکەوێتەوە. 

 

ئەوەی پێویستە بیزانیت: ڕۆژی 4ـی شوبات، کۆبوونەوەی شاندی تەکنیکی پارتی دیموکراتی کوردستان و یەکێتیی نیشتمانیی کوردستان دوایین کۆبوونەوەی نێوانیان ئەنجامدا و لەسەر نووسینەوەی ڕەشنووسێک ڕێککەوتن و شاندی هەردوولاش ڕایانگەیاند، ڕێککەوتن و تێگەیشتنی هاوبەش لەسەر زۆربەی تەوەرەکان کراوە.

 

باکگراوند: ڕۆژی 20-10-2024 هەڵبژاردنی پەرلەمانی کوردستان ئەنجامدرا، پارتی دیموکراتی کوردستان 39 کورسی و یەکێتیی نیشتمانیی کوردستان 23 کورسییان بەدەستهێنا.