داواکارییەکی خێرا لە هاتووچۆی سلێمانییەوە بۆ شۆفێران

ئاڤا نیوز

 

بەهۆی بارینی بەفر و دابەزینی پلەكانی گەرما و شەختەبەندیی ڕێگاكان، بەڕێوەبەرایەتیی هاتووچۆی سلێمانی داوا لە شۆفێران دەكات سەردانی ناوچە شاخاوییەكان نەكەن.

 

وێنە گەورەكە: شەپۆڵێكی چڕی بەفر و بارانبارین هەرێمی كوردستان گرتووەتەوە و پلەكانی گەرماش دابەزین، ئەمەش بەهۆی کاریگەری تێكەڵبوونی دوو تەوژمە هەوای پەستان نزمی دەریای ناوەڕاست و بارستە هەوای ساردی سیبریی ڕووسیا ڕوودەدات و تا ناوەڕاستی ئەم هەفتەیە بەردەوام دەبێت.

 

ڕاگەیێنراوی فەرمی: بەڕێوەبەرایەتیی هاتووچۆی سلێمانی ڕایگەیاند: ئاگاداری سەرجەم دانیشتووانی شارەکەمان دەکەین كە ئێستا سەردانی ناوچە شاخاوییەکان نەکەن یان ئەو شوێنانەی مەترسی بەستن و شەختەی لێ دەکرێت، ئەمە لەپێناو سەلامەتیی خۆتان و دوورکەوتنەوەتان لە گیرخواردن و کارەساتی نەخوازراو.

 

ئەوەی پێویستە بیزانیت: هەر كاتێک لە سنووری سلێمانی بەفر دەبارێت دانیشتووانی شارەكە بۆ شەڕەتۆپەڵ و بەسەربردنی كاتێكی خۆش ڕوو لە هەردوو شاخی گۆیژە و ئەزمەڕ دەكەن، مەبەستی بەڕێوەبەرایەتیی هاتووچۆی سلێمانیش زیاتر ئەو دوو ناوچە شاخاوییەیە.