هەڕەشەکانی ترەمپ لە ئێران بەهای تمەنی بۆ نزمترین ئاست دابەزاند

ئاڤا نیوز

 

بەهۆی گوشاری سزاکانی ئەمریکا بۆ ئێران و قەیرانی ئابووری ڕۆژ لە دوای ڕۆژ  تمەنی ئێرانی زیاتر بەهای لەدەستدەدات. ئەوەش زیانی بە بەشێکی زۆر لە مامەڵەکارانی تمەن لە عێراق گەیاندووە.

 

چیرۆکی سەرەکی: تمەنی ئێرانی بەشێوەیەکی خێرا ڕوو لە دابەزینە، بە جۆرێک بەشێوەی کاش 100 دۆلار بەرامبەر بە 8 ملیۆن و 700 هەزار تمەن ئاڵوگۆڕی پێوەکرا، بەڵام ئەگەر بەشێوەی حەواڵە بێت ئەوا بەهای 100 دۆلار گەیشتووەتە 9 ملیۆن و 550 هەزار تمەن. بەهۆی ناجێگیرییەوە، بەشێک لە مامەڵەکاران مامەڵەکردنیان بە تمەن ڕاگرت و دەڵێن جووڵە و دابەزینەکەی بە شێوەیەک خێرایە ناتوانن هیچ مامەڵەیەک بکەن. 

 

لێدوانی فەرمی: کەیفی خۆشناو، گوتەبێژی بازاڕی دۆلارەکەی هەولێر بە ئاڤای ڕاگەیاند، لێدوانەکانی ترەمپ سەبارەت بە سزادانی ئێران کاریگەری ڕاستەوخۆی کردووەتە سەر دینار و تمەنی ئێرانی و هەردووکیان دابەزینیان تۆمارکردووە.

 

کاریگەری و لێکەوتەکان: بەگوتەی کەیفی خۆشناو، بەهۆی مامەڵەکردن بە تمەنی ئێرانییەوە، خەڵکێکی زۆر لە بازاڕی دۆلارەکەی هەولێر مایەپووچبوون. ئەو دەڵێت، "تەنانەت هەندێکیان  کاتێک تمەنیان کڕیوە هەر 100 دۆلارێک لە ئاستی چوار ملیۆن تمەندا بووە، کەچی ئێستا نۆ ملیۆنیشی تێپەڕاندووە، بەهۆیەوە مایەپووچ بوون و هیچیان نەماوە. هیچ کەس تاوەکو ئێستا لە مامەڵەکردن بە تمەن قازانجی نەکردووە، بەڵکو هەموویان زیانمەندن. 

 

لەلایەکی دیکە: ئەمە لە کاتێکدایە، لە نوێترین بریاریدا دۆناڵد ترەمپ سەرۆکی ئەمریکا ڕێگەپێدانی عێراقی بۆ کڕینی گازی سرووشتی و کارەبای ئێرانی ڕاگرت. داواشیکردووە ڕێوشوێنەکان خێرا بکرێت و بەپەلە وەزارەتی گەنجینەی ئەمریکا و لایەنە پەیوەندیدارەکان بێنە سەرهێڵ تاوەکو ڕێگری لە ئێران بکەن سیستمی دارایی عێراق بۆ خۆدزینەوە لە سزاکان بەکار بهێنێت.